ტრენინგი ახალციხეში ეთნიკური უმცირესობების გასააქტიურებლად

ერთდღიანი ტრენინგი, ხვალ, 2 მაისს, „ახალციხის დემოკრატიული ჩართულობის ცენტრში“ ჩატარდება. დასწრება ყველა მსურველს შეუძლია.

ტრენინგებს ორგანიზაცია „საქართველოს შეფასების ასოციაცია“, პროექტის - „ეთნიკური უმცირესობების წარმომადგენლების უფლებებისა და შესაძლებლობების გაფართოება ადგილობრივი თვითმმართველობების მიერ გადაწყვეტილებების მიღებისა და მონიტორინგის პროცესში ჩართვის მიზნით“ - ფარგლებში მართავს. პროექტი საქართველოს ოთხ ქალაქში: ახალციხეში, ახალქალაქში, გარდაბანსა და ბოლნისში ხორციელდება.

„ძირითადი აქცენტი ეთნიკურ უმცირესობებზე გავაკეთეთ, ამიტომ შევარჩიეთ ეს ოთხი ქალაქი“, - ამბობს პროექტის კოორდინატორი კონსტანტინე ჩორგოლიანი.

მისი განმარტებით, პროექტის ფარგლებში ჩატარდა კვლევა, რამდენად იყო მოსახლეობა ინფორმირებული ადგილობრივი ხელისუფლების აქტივობების შესახებ. ტრენინგების თემატიკა კვლევის შედეგების შესაბამისად შეირჩა. ტრენინგების შემდეგ შეხვედრებია დაგეგმილი.

„ტრენინგები და შეხვედრები ხელს შეუწყობს მოსახლეობის ცნობიერების ამაღლებას. იმის გათვითცნობიერებას, რომ მათ აქვთ გადამწყვეტი როლი არჩევნებში და შეუძლიათ თვითმმართველობის საქმიანობაში ჩართვა. უნდა გავზარდოთ მუნიციპალიტეტის მზაობა და ანგარიშვალდებულებაც, რომ მათ დროულად მოახდინონ პასუხების გაცემა“, - ამბობს კონსტანტინე ჩორგოლიანი.

[თამარ თოთაძე, ახალციხე]