ახალციხეში 9 მაისი აღნიშნეს

94 წლის ივანე გოზალიშვილი, 1941 წლის 20 ივნისს, იმ დღეს, როცა სკოლის დამთავრების გამოსაშვები საღამო უნდა ეზეიმა, მეორე მსოფლიო ომში გაიწვიეს.

„21 ივნისს სკოლის დამთავრება უნდა აღგვენიშნა და 20–ში ღამით დაბომბვა დაიწყო. სტალინის ბრძანებით 1941 წლის ბოლოს ქართული ნაციონალური დივიზიები ჩამოყალიბდა და იქ მომიწია ბრძოლა. ჩვენი 406–ე მსროლელი დივიზია თურქეთის საზღვართან იდგა. ოცმეთაური ვიყავი. ისეთი გაჭირვება იყო, რომ სურსათს და ტყვია–წამალს ვირებით ვეზიდებოდით“, – იხსენებს მეორე მსოფლი ომის ვეტერანი ივანე გოზალიშვილი ომში გატარებულ წლებს და ამბობს, რომ ბრძოლაში ბევრი მეგობარი დაკარგა. თავად კი 1941 წლიდან 1946 წლამდე, ისე იბრძოლა, რომ არცერთხელ დაჭრილა.

აწყურიდან გოჩაძეების შვიდსულიანმა ოჯახმა, მეორე მსოფლიო ომში ხუთი ვაჟი გაგზავნა. მათ შორის ორი დაიღუპა. გადარჩენილებს შორის ერთ–ერთი დავით გოჩაშვილი კი იხსენებს, რომ თავად მძიმედ დაიჭრა. მიუხედავად ამისა, მკურნალობიდან 15 დღის შემდეგ ბრძოლის გაგრძელება მაინც მოუხდა.

„სკოლა რომ დავამთავრე ომში იმ წელს წამიყვანეს, აგვისოტში. უკრაინამდე ვიბრძოდი, მესაზღვრეც ვიყავი. ომში ბოლომდე დავრჩი“, – ამბობს დავით გოჩაშვილი.

დღეს იგი თანამებრძოლებთან ერთად ახალციხეში მეორე მსოფლიო ომის დროს დაღუპულთა მემორიალთან დილიდან მივიდა. აქ შეკრებილებს ადგილობრივი თივთმმართველობისა და სამხარეო ადმინისტრაციის წარმომადგენლებმა ფაშიზმზე გამარჯვების 70–ე წლისთავი მიულოცეს.

„ეს დღე ფაშიზმსა და ბოროტებაზე გამარჯვების დღეა. გილოცავთ! ჩვენ თქვენი გმირობის მაგალითებზე გავიზარდეთ და ღმერთმა დიდხანს გაცოცხლოთ, რომ მომავალში კიდევ მრავალი 9 მაისი აღვნიშნოთ თქვენთან ერთად“, – მიმართა ვეტერანებს სამცხე–ჯავახეთის გუბერნატორმა აკაკი მაჭუტაძემ.

ახალციხის მუნიციპალიტეტში ქალაქშიც და თემშიც 23 ვეტერანია, თუმცა მათ შორის, მემორიალთან მისვლა მხოლოდ 11–მა შეძლო. მათ კოლეჯმა „ოპიზარმა“ ტკბილეული გადასცა, ვეტერანთა საბჭომ კი ორდენები და ღვინო. ასევე, თემში მცხოვრებ ვეტერანებს 150 ლარი, ქალაქში მაცხოვრებლებს კი 200 ლარი დაერიცხებათ პირად ანგარიშზე. გარდა ამისა, ქვეყნის მასშტაბით თითოეული ვეტერანი სახელმწიფოსგან 1000 ლარს მიიღებს.

იმ ვეტერანებთან, რომლებმაც მემორიალთან მისვლა ვერ შეძლეს, ადგილობრივი თვითმმართველობის წარმომადგენლები პირადად მივიდნენ და საჩუქრები გადასცეს.

მემორიალთან შეკრებილები კი ღონისძიების დასრულების შემდეგ საზეიმო სადილზე მიიწვიეს.

[თამუნა უჩიძე, ახალციხე]