ახალციხესა და ადიგენში 9 მაისი იზეიმეს[Photo]

ადიგენის მუნიციპალიტეტის გამგებელმა ზაქარია ენდელაძემ და ადგილობრივი თვითმმართველობის თანამშრომლებმა, მეორე მსოფლიო ომის დროს გარდაცვლილ გმირთა მემორიალი ადიგენში ყვავილებით შეამკეს და მუნიციპალიტეტში მცხოვრებ ომის ვეტერანებს 9 მაისი მიულოცეს. ენდელაძემ სამამულო ომის ვეტერანებს მედლები და მისალოცი ბარათები გადასცა. ამის შემდეგ კი ვეტერანები საზეიმო სადილზე მიიწვია.

ახალციხის მუნიციპალიტეტისა და საკრებულოს წარმომადგენლები კი დღეს დილიდან ყველა იმ სოფელში მივიდნენ, სადაც სამამულო ომში დაღუპულთა მემორიალი დგას. მათ მემორიალები ომის ვეტერანებთან ერთად ყვავილებით შეამკეს. თემის წარმომადგენლებმა საზეიმო ღონისძიებები გამართეს ტყემლანაში, დიდ პამაჯში, სხვილისსა და წყალთბილაში.

ახალციხის მუნიციპალიტეტის სოფლებში 16 ომის ვეტერანია. მათ ვინც მემორიალებთან მისვლა ვერ შეძლეს, ადგილობრივი თვითმმართველობის წარმომადგენლებმა დღევანდელი დღე სახლებში მიულოცეს და საჩუქრებიც გადასცეს.

ომის ვეტერანებს სახელმწიფო პირად ანგარიშზე 1000 ლარს დაურიცხავს. ამ თანხას ახალციხის მუნიციპალიტეტის სოფლებში მცხოვრები თითოეული ვეტერანისთვის, ადგილობრივი ბიუჯეტიდან გამოყოფილი, 150 ლარიც დაემატება.
სამცხე-ჯავახეთიდან ომში 44 730 ადამიანი გაიწვიეს. ახალციხის მუნიციპალიტეტიდან კი, 10 538, მათ შორის სამი საბჭოთა კავშირის გმირი გახდა, ხოლო 2 500 შინ ვეღარ დაბრუნდა.













[sknews.ge]