ახალციხის სოფლებში ფაშიზმზე გამარჯვების 71-ე წლისთავი აღინიშნეს

ახალციხის მუნიციპალიტეტში ომში დაღუპულთა მემორიალი 13 სოფელში დგას. ცამეტივე სოფელში ადგილობრივებმა დღეს, 9 მაისს ფაშიზმზე გამარჯვებისადმი მიძღვნილი საზეიმო ღონისძიება გამართეს.

ამ ეტაპზე მუნიციპალიტეტის მასშტაბით 15 ომის ვეტერანი ცხოვრობს. უმეტესობამ ჯანმრთელობის მდგომარეობის გამო ღონისძიებაზე დასწრება ვერ შეძლო, მუნიციპალიტეტის გამგებელმა ზაზა მელიქიძემ, თვითმმართველობის წარმომადგენლებთან ერთად ისინი ოჯახებში მოინახულა და საჩუქრები გადასცა.

ომის ვეტერანებს ახალციხის გამგეობამ თითოეულს 200–200 ლარი ჩაურიცხა და საჩუქრად ჰიგიენური მოვლის საშუალებები და ტკბილეული გადასცა. საქართველოს მთავრობისგან კი მათ 600 ლარიანი დახმარება მიიღეს.

საჩუქრების შესაძენად ადგილობრივი ბიუჯეტიდან 500 ლარამდე დაიხარჯა.

შეგახსენებთ, რომ მეორე მსოფლიო ომში სამცხე-ჯავახეთიდან 44 730 ადამიანი გაიწვიეს. ახალციხის მუნიციპალიტეტიდან კი, 10 538, მათ შორის სამი საბჭოთა კავშირის გმირი გახდა, ხოლო 2 500 შინ ვეღარ დაბრუნდა.



[sknews.ge]