სტიქიით დაზარალებულები დახმარებას დღემდე ელიან

ადიგენის მუნიციპალიტეტს მიმდინარე წელს სტიქიამ რამდენჯერმე შეუტია. ზაფხულის დასაწყისში ძლიერმა სეტყვამ, აგვისტოში კი ძლიერმა ქარიშხალმა, მოსახლეობა საგრძნობლად დააზარალა. ადგილობრიოვები ღარიბ შემოდგომას პროგნოზირებენ და ჩივიან, რომ ადგილობრივი ხელისუფლებისგან მიღებული დახმარება მიზერულია.

ადიგენის მუნიციპალიტეტის სოფელ კახარეთში სტიქია ოთხჯერ განმეორდა. ადგილობრივების თქმით, მოსავლის უმეტესი ნაწილი განადგურებულია.

”კარტოფილი ყვავილში როცა იყო, მაშინ დასეტყვა. 900 მეტრზე მაქვს დათესილი და სულ გააფუჭა, თუ ველოდებოდი 5-6 ტონას, ახლა ალბათ ერთ ტონამდე თუ ავიღებ”, - ამბობს სოფელ კახარეთში მცხოვრები მაია გავაშელი.

გარდა ნათესებისა სტიქიამ ხეხილის ბაღებიც დააზიანა. სოფელ კახარეთში, სადაც ძირითადად ვაშლის ბაღებია, წელს მოსავალს აღარ ელოდებიან. ადგილობრივები ამბობენ, რომ ხეებზე მხოლოდ ჭანჭური შერჩა და ისიც ისეა დაზიანებული, რომ გასაყიდად არ გამოდგება.

ადგილობრივი ლიანა მწყერაშვილი გასულ წელს იხსენებს და ამბობს, რომ უხვი მოსავალი არც შარშან მიუღიათ. ხოლო ის, რაც უხვად მოვიდა, ვერ გაყიდეს. წელს სოფელში ტონობით კომბოსტო გადაყარეს.

”შარაშანდელი წელი გაჭირვებით გავიარეთ, ამდენი კომბოსტო გაგვიფუჭდა და კაპიკებშიც ვერ გავყიდეთ. წლევანდელმა სტიქიამ მთელი ნათესები გაგვინადგურა, კარტოფილი საერთოდ აღარ მოვიდა, შარშანდელის მერე წლევანდელი ზარალი რომ ადამიანს დაემატება, როგორ უნდა იცხოვროს? 70-ლარიან პენსიაზე ვართ მიჩერებული”, - ამბობს იგი.

5 აგვისტოს ძლიერმა ქარმა ადიგენის მუნიციპალიტეტის სოფლები: ლელოვანი, კახარეთი, სამყური, ღორძე, ვარხანი, წახანი, ხარჯამი და ქიქინეთი, განსაკუთრებით დააზარალა. ქარის შედეგად დაზიანდა საცხოვრებელი სახლების სახურავები.

სოფელ ღორძეში ძლიერმა ქარმა ერთი სახლი მთლიანად დაანგრია, რამდენიმე კი სახურავის გარეშე დატოვა. ქარმა სახურავები გადახადა საქონლის სადგომებსაც. სოფელი წელს ვერც სეტყვას გადაურჩა.

”კარტოფილი, სიმინდი, ლობიო, პომიდორი; ნიადაგს ზემოთ რაც იყო, სეტყვამ ყველაფერი გააფუჭა. კარტოფილის ამოღება ჯერ არ დაგვიწყია, მაგრამ შარშანდელთან შედარებით ნაკლებ მოსავალს ველოდებით. ათ ტონას თუ ვიღებდი, ახლა ხუთს მივიღებ ალბათ”, - ამბობს სოფელ ღორძეში მცხოვრები ეთერი პაქსაძე.

სოფელში ამბობენ, რომ დახმარება მხოლოდ იმ ადამიანებმა მიიღეს, ვისაც სახლის სახურავები დაუზიანდათ. დაზიანებული ნათესების გამო მოსახლეობას არავინ არაფრით დაეხმარებია.

ადიგენის მუნიციპალიტეტის გამგეობაში ადასტურებენ, რომ ქარის შედეგად დაზარალებულ მოსახლეობას კრამიტით დაეხმარნენ. ნათესების კომპენსაციაზე კი ჯერ არაფერია ცნობილი.

ადიგენის მუნიციპალიტეტის გამგებლის სიმონ პარუნაშვილის თქმით, კრამიტით103 ოჯახს დაეხმარნენ. თანხა მთავრობის სარეზერვო ფონდიდან სამხარეო ადმინისტრაციამ მიიღო. სტიქიით დაზარალებულ მუნიციპალიტეტებს პირდაპირ სამშენებლო მასალები გადაეცათ.
ამიტომ, რა თანხა ერგო წილად ადიგენს, გამგებელი ვერ აკონკრეტებს.

”ვისაც სახურავები გადაუხადა, ადგილზე მივუტანეთ კრამიტი. ზოგს ათი თუნუქი სჭირდებოდა, ზოგს 30, ზოგს 200, მივუტანეთ და თვითონ შეაკეთეს. ჩვენ არ ვიცით თანხა რამდენი იყო გამოყოფილი, რადგან თანხა არ აგვიღია”, - ამბობს გამგებელი.

მისივე თქმით, ნაკვეთების აღწერის შედეგად დადგინდა, რომ მუნიციპალიტეტის მასშტაბით 90 ჰექტარი სახნავ-სათესია დაზიანებული.

”აღვწერეთ და გადავაგზავნეთ სრული მონაცემები მთავრობაში და ჯერ-ჯერობით მხოლოდ ეს სახურავები მოგვივიდა”, - აცხადებს სიმონ პარუნაშვილი.

[თამარ თოთაძე, ახალციხე]