ნინოწმინდისა და ასპინძის სასოფლო საკონსულტაციო სამსახურებში ვაკანსია გამოცხადდა

სოფლის მეურნეობის სამინისტროს სამცხე–ჯავახეთის სამმართველოს სასოფლო საკონსულტაციო სამსახურები რეგიონის ექვს მუნიციპალიტეტში აქვს. მას შემდეგ, რაც აღნიშნული სამსახურის რეორგანიზაცია მოხდა, კონკურსი გამოცხადდა. თანამშრომლების ნაწილი უკვე შეარჩიეს. ნინოწმინდისა და ასპინძის სასოფლო საკონსულტაციო სამსახურში კი მთავარი სპეციალისტის ვაკანსიაა გამოცხადებული.

„მთავარი სპეციალისტის ვაკანსიაზე ძირითადი მოთხვნებია, აგრარული მიმართულების ან მისი მონათესავე სპეციალობის დიპლომის ქონა, ანუ უმაღლესი განათლება. ასევე გამოცდილება აგრარულ სფეროში ან ვეტერინარიაში. გარდა ამისა, აუცილებელია სახელმწიფო ენის ცოდნა, რადგან მას მოუწევს დოკუმენტებთან მუშაობა“, – ამბობს სოფლის მეურნეობის სამინისტროს სამცხე–ჯავახეთის რეგიონული სამმართველოს უფროსი ნანა ზუბაშვილი.

განცხადებების მიღება 6 მაისამდეა. ვაკანსია საჯარო სამსახურის დასაქმების ბიუროს საიტზეა განთავსებული. კონკურსი ორ ეტაპად ჩატარდება, პირველი ეტაპი საბუთების გადარჩევა, მეორე კი გასაუბრება იქნება.

[თამარ თოთაძე, ახალციხე]