სოფლის მეურნეობის სამინისტროს რეგიონულ სამმართველოში საინფორმაციო შეხვედრა შედგა

რეგიონული სამმართველოს ახალი უფროსი სამსახურის მუშაობის სტრუქტურას უკვე გაეცნო. დღეს, 29 აპრილს კი სოფლის მეურნეობის სამინისტროს დაქვემდებარებული სამსახურების ხელმძღვანელებს შეხვდა, მათგან მუშაობის შესახებ ინფორმაცია მოისმინა და პრობლემებს გაეცნო.

„გავაცანი ჩვენი სამმართველოს დებულება, რა ფუნქციები უნდა შეითავსოს, რა უფლება–მოვალეობები აქვს. ასევე ვისაუბრეთ რამდენად მნიშვნელოვანია ჩვენთვის ყველა ამ უწყებასთან კოორდინაცია და ხშირი თანამშრომლობა, რადგან სოფლის მეურნეობის სამინისტროს ჰქონდეს ზუსტი ინფორმაცია, მოახდინოს სწრაფი რეაგირება არსებულ პრობლემებზე. თითოეულმა უწყებამ, მათ შორის ჩვენც, კარგად უნდა დავინახოთ რა არის ფერმერის პრობლემა“, – ამბობს ნანა ზუბაშვილი.

მისივე თქმით, რეგიონული სამმართველო მუნიციპალიტეტებთანაც ითანამშრომლებს: „ერთ–ერთ პრობლემას საირიგაციო სისტემა წარმოადგენს. სამელიორაციო სისტემა მუნიციპალიტეტებს გადაეცა, ამიტომ გვიწევს არა მარტო სტატისტიკური მონაცემების შეგროვება, არამედ ხელშეწყობა სხვადასხვა ორგანიზაციებთან და სახელმწიფო უწყებებთან ერთად რა შეიძლება გაკეთდეს“.



შეგახსენებთ, რომ სოფლის მეურნეობის სამინისტროს სამცხე–ჯავახეთის რეგიონული სამმართველოს ახალი უფროსი თანამდებობაზე მიმდინარე წლის 20 აპრილს დაინიშნა. ნანა ზუბაშვილმა პოსტი კონკურსის წესით დაიკავა.

აღნიშნულ სამსახურში განმარტავენ, რომ კონკურსი სამსახურის რეორგანიზაციის გამო გამოცხადდა.

„მიმდინარე წლის იანვრის დასაწყისში სოფლის მეურნეობის საინფორმაციო–საკონსულტაციო რაიონული სამსახურის ლიკვიდაცია მოხდა და შეიქმნა საქართველოს სოფლის მეურნეობის სამინისტროს სამცხე–ჯავახეთის რეგიონული სამმართველო. რეორგანიზაციის შედეგად ყველა თანამშრომელი მოვალეობის შემსრულებლად დავინიშნეთ. შემდეგ გამოცხადდა კონკურსი, სადაც მონაწილეობა მივიღეთ“, – ამბობს სოფლის მეურნეობის სამინისტროს სამცხე–ჯავახეთის რეგიონული სამმართველოს უფროსის მოადგილე მამუკა თამარაძე, რომელიც ამ თანამდებობაზე კონკურსის გამოცხადებამდეც მუშაობდა.



[თამარ თოთაძე, ახალციხე]