ახალციხის კულუტრის სახლის შენობა ინგრევა

რომ არა ღია ფანჯრებიდან გამოსული სხვადასხვა საკრავების ხმა, ახალციხის ცენტრალურ ნაწილში მდებარე შენობის დანახვისას ძნელია იფიქრო, რომ აქ რამე ორგანიზაციაა, მითუმეტეს, კულტურის სახლი. შენობის ნაცრისფერი კედლები დაბზარულია, ფანჯრები ჩაშავებული, ხის კარი დაძველებული.

დაწესებულების ხელმძღვანელი მავრა ბახტურიძე იხსენებს, რომ გასულ წელს ერთ–ერთ ოთახში, ჭერიდან ბათქაში ჩამოინგრა: „ფორტეპიანოს გაკვეთილი ტარდებოდა, საბედნიეროდ არავინ დაშავებულა, ახლა ამ ოთახს ვეღარ ვიყენებთ“.

იაძის ქუჩაზე მდებარე კულტურის სახლის შენობა ორ საუკუნეზე მეტს ითვლის. ამორტიზებულ შენობაში მცირე ფართი და არასათანადო პირობებია.

კულტურის სახლში ერთი პატარა ზომის დარბაზი და ერთი სამედიცინო ოთახია. მასწავლებლებს გაკვეთილის ჩატარება მორიგეობით უწევთ.

„ორი საათის შემდეგ კაბინეტი უნდა დავტოვო რომ დოლის გაკვეთილები ჩატარდეს“, – ამბობს მავრა ბახტურიძე.

მისი თქმით, დაწესებულებას საკმარისი ფინანსები არ აქვს, იმისთვის რომ ამორტიზებული შენობა შეკეთდეს. კულტურის სახლში მენეჯერისა და სამი თანამშრომლის გარდა, პედაგოგები ხელფასს გამომუშავებით, მოსწავლეების რაოდენობის მიხედვით იღებენ.

მოძველებული ინსტრუმენტების გასაახლებლად ხელმძღვანელობას თანხა არ აქვს. დოლს, გიტარას, ფანდურს და სხვა საჭირო ინსტრუმენტებს, მოსწავლეები თავად ყიდულობენ.

კულტურის სახლისთვის ადგილობრივი ბიუჯეტიდან ყოველწლიურად 11.959 ლარია გამოყოფილი. თანხა ხელფასების , სამივლინებო, საკანცელარიო და კომუნალური ხარჯებისთვისაა გათვალისწინებული. მოსწავლეების გადასახადიდან შესული თანხიდან ნაწლი კულტურის სახლის ანგარიშზე ირიცხება, ნაწილი კი საშემოსავლო გადასახადებს და პედაგოგების ხელფასს ხმარდება.

ახალციხის კულტურის დაწესებულებათა გაერთიანების ხელმძღვანელის ზაირა კელაპტრიშვილის განმარტებით შენობა ავარიულია და იმის გარემონტება–რეაბილიტაციას აზრი არ აქვს. კელაპტრიშვილი გამოსავალს ახალი შენობის მოძებნაში ხედავს.

ახალციხის მერიაში კულტურის სახლის მდგომარეობის შესახებ იციან და დაწესებულებისთვის ალტერნატიულ ფართს ეძებენ. თუმცა იმ შენობის ბედი, რომლის გადმოცემას მერია ეკონომიკის სამინისტროდან ითხოვს, ჯერ გაურკვეველია.

„მეხუთე წერილს ვწერთ ეკონომიკის სამინისტროს. შენობა , რომელიც განლაგებულია ყოფილი სასაზღვრო რაზმის ტერიტორიაზე, სახელმწიფოს საკუთრებაა და უპატრონობისგან ინგრევა. ვწერთ, მაგრამ პასუხს არ გვწერენ“, – ამბობს ახალციხის მერი გიორგი კოპაძე.

სახელმწიფო ქონების ეროვნული სააგენტოში ამბობენ, რომ რუსთაველის ქუჩაზე, N 124–ში არსებული ფართი სახელმწიფოს საკუთრებაა. წლების განმავლობაში ტერიტორიას შინაგან საქმეთა სამინისტრო იყენებდა.

"მოსაზრებაზეა გაგზავნილი შსს–ში, მათგან მიღებული პასუხის საფუძველზე ვიმოქმედებთ კანონის შესაბამისად. პასუხის მიღების შემდეგ ეცნობება ახალციხის მერიასაც“, – განგვიმარტეს სახელმწიფო ქონების ეროვნულ სააგენტოში.

კულტურის სახლის შენობა მეთვრამეტე საუკუნის 80–იან წლებშია აშენებული. შენობაში საბჭოთა პერიოდის დროს სასამართლო იყო, მანამდე კი საწყობად იყენებდნენ. 1978 წლიდან დღემდე აღნიშნულ შენობაში კულტურის სახლია განთავსებული. კულტურის სახლის ყოფილი თანამშრომელი ნათელა იაძე განმარტავს, რომ აღნიშნულ შენობაში 4 წლით იმ პირობით შეუშვეს, რომ ქალაქის ცენტრში ყოფილი ბაზრის ტერიტორიაზე ახალი შენობა უნდა აშენებულიყო და აღნიშნული დაწესებულება იქ უნდა გადასულიყო. თუმცა, კულტურის სახლს ახალი შენობა დღემდე არ აქვს.



[თინათინ ზაზაძე, ახალციხე]