ასპინძაში კულტურის სახლის რეაბილიტაცია იწყება

ასპინძის მუნიცპალიტეტის კულტურის, ძეგლთადაცვის, ტურიზმისა და ახალგაზრდობასთან ურთიერთობის სამსახურში განმარტავენ, რომ შენობა ავარიულია და გადაუდებელი რეკონსტრუქცია სჭირდება.

„შენობის უკანა კედელი გახსნილია, დაზიანებულია იატაკი და სახურავი, ყველა ოთახში წვიმა ჩამოდის. კულტურის სახლს არასდროს ჰქონია საპირფარეშო“, – ამბობს კულტურის, ძეგლთა დაცვის, ტურიზმისა და ახალგაზრდობასთან ურთიერთობის სამსახურის უფროსის დროებით მოვალეობის შემსრულებელი მაკა ბერიძე.

მისი თქმით, მიუხედავად კულტურის სახლის ავარიულობისა, მის გარემონტებას ვერ ახერხებდნენ, რადგან შენობა 2015 წლამდე ეკონომიკის სამინისტროს ბალანსზე იყო.

უკვე გადაწყვეტილია, რომ შენობის სარეაბილიტაციო სამუშაოებს შპს „კ–კომპანია“ ჩაატარებს. სამუშაოები სამი თვის ვადაში უნდა დაასრულდეს. რეაბილიტაციისთვის 220.580 ლარი დაიხარჯება.

ასპინძის მუნიციპალიტეტის გამგეობაში განმარტავენ, რომ კულტურის სახლის რეაბილიტაციისთვის თანხა შპს „კოლხთან“ მოგებული პროცესის შემდეგ გამოჩნდა.

როგორც გამგებლის მოადგილე ალექსანდრე პაპაშვილი განმარტავს, შპს „კოლხმა“ 2013 წელს ასპინძაში მდინარე ოთის სათავე ნაგებობას და დაბამდე მისასვლელ სასმელი წყლის მაგისტრალს რეაბილიტაცია ჩაუტარა, რისთვისაც 1.100.100 ლარი იყო გათვალიწინებული. უხარისხოდ ჩატარებული სამუშაოების გამო, მუნიციპალიტეტმა კომპანიას სასამართლოში უჩივლა და 375.000 ლარი უკან დაიბრუნა, ამის შემდეგ გადაწყდა კულტურის სახლის რეაბილიტაცია, აღნიშნული თანხით ასპინძაში ჭიდაობის დარბაზიც რემონტდება.

"თანხა რეგიონული ფონდიდან იყო გამოყოფილი. სასამართლო პროცესის მოგების შემდეგ, მთავრობასთან შეთანხმებით, განკარგულებით შარშან დეკემბერში გადმოგვეცა აღნიშნული თანხა“, – ამბობს ალექსანდრე პაპაშვილი.

[თინათინ ზაზაძე, ახალციხე]