სამცხე–ჯავახეთის უნივერსიტეტში ეკონომიკური თავისუფლების შესახებ იმსჯელეს

ლექცია–სემინარი 28 აპრილს, სამცხე–ჯავახეთის სახელმწიფო უნივერსიტეტის მეორე კორპუსში, ორ საათს მიმდინარეობდა. ახალგაზრდებთან მომხსენებლებმა შემდეგ თემებზე ისაუბრეს: ეკონომიკური თავისუფლება და ეკონომიკის ციკლური განვითარება, კერძო საკუთრების დამკვიდრების გზით ქვეყნის ქვეყნის ეკონომიკური განვითარების შესაძლებლობები, კერძო სექტორისა და დასაქმების დონის ურთიერთკავშირი, საქართველოს ეკონომიკური თავისუფლების ხარისხი და ეკონომიკის განვითარების პერსპექტივები.

„გავაცანით სტუდენტებს როგორაა განაწილებული მიწები საკუთრებაში რეგიონების მიხედვით. ცნობისთვის, სასოფლო–სამეურნეო მიწების მხოლოდ 40 პროცენტია კერძო მესაკუთრეთა ხელში და დანარჩენი ჯერ კიდევ სახელმწიფოს ეკუთვნის. ვისაუბრეთ ასევე იმის შესახებ, თუ რა რეფორმა შეიძლება გატარდეს კერძო საკუთრების ფორმირების თვალსაზრისით“, – ამბობს „ეკონომიკური პოლიტიკის ექსპერტთა ცენტრის“ პრეზიდენტი რამაზ გელდიანი.

სტუდენტების თქმით, მათ ბევრი ახალი ინფორმაცია მიიღეს.

„განსაკუთრებით საინტერესო წარმოდგენილი სტატისტიკა და საქართველოში არსებული ვთარების სხვა ქვეყნებთან შედარება იყო“, – ამბობს მეორე კურსის სტუდენტი ვერა სარქისიანი.



[თამუნა უჩიძე, ახალციხე]