მსოფლიო ბანკის ფინანსური მხარდაჭერით სამცხე-ჯავახეთში ინფრასტრუქტურული პროექტები განხორციელდება

მცხეთა-მთიანეთის და სამცხე-ჯავახეთის რეგიონებში იგეგმება ურბანული, კომუნალური და ტურისტული ინფრასტრუქტურის რეაბილიტაცია, კულტურული მემკვიდრეობის და ისტორიული ძეგლების აღდგენა, აგრეთვე სხვადასხვა ქალაქებში ვიზიტორთა რაოდენობის გაზრდის მიზნით ტურისტული ინფრასტრუქტურის აღდგენითი სამუშაოების განხორციელება.

აღნიშნული სამუშაოებისთვის საქართველო 60 მილიონი აშშ დოლარის ოდენობის შეღავათიან ფინანსურ რესურსს მიიღებს. რასაც საქართველოს მთავრობის მიერ გამოყოფილი 15 მილიონი აშშ დოლარი დაემატება.

ხელშეკრულებას ხელი გუშინ, 7 აგვისტოს, ფინანსთა მინისტრმა ნოდარ ხადურმა და საქართველოში მსოფლიო ბანკის ოფისის ხელმძღვანელის მოვალეობის შემსრულებელმა იოსებ მელითაურმა მოაწერეს.

პროექტს 2015-1019 წლებში რეგიონული განვითარებისა და ინფრასტრუქტურის სამინისტროს, მუნიციპალური განვითარების ფონდი განახორციელებს.

პროექტი მცხეთა-მთიანეთსა და სამცხე -ჯავახეთის რეგიონების მასშტაბით, ურბანული, კომუნალური, ტურისტული ინფრასტრუქტურის რეაბილიტაციას, კულტურული მემკვიდრეობისა და ისტორიული ძეგლების პოპულარიზაციას, ამასთან კერძო სექტორის ხელშეწყობას ითვალისწინებს.

აღნიშნული პროექტების განხორციელება ხელს შეუწყობს ცხოვრების დონის ამაღლებას, ინფრასტრუქტურის მშენებლობა-რეაბილიტაციისა და კერძო სექტორში ინვესტიციების მოზიდვას. რეგიონებში ტურისტული პოტენციალის ათვისება, გაზრდის ადგილზე დასაქმებისა და ეკონომიკური განვითარების შესაძლებლობებს.

ასევე დაგეგმილია ტურისტული მარშრუტების განვითარება, რომელიც ურბანული ლანდშაფტის და საზოგადოებრივი ავტოსადგომების განვითარებას, საინფორმაციო ჯიხურების, კაფეების და საზოგადოებრივი საპირფარეშოების მშენებლობას ითვალისწინებს.

მნიშნელოვანია, რომ მსოფლიო ბანკის ფინანსური მხარდაჭერით, ამ ეტაპზე უკვე მიმდინარეობს ორი მსგავსი პროექტი იმერეთისა და კახეთის რეგიონებში.

[sknews.ge]