სამცხე–ჯავახეთისა და არტაანის გუბერნატორებმა რეგიონების განვითარებაზე იმსჯელეს

თურქეთიდან ხუთკაციანი დელეგაცია, არტაანის რეგიონის გუბერნატორთან მეჰმეთ ემინ ბილმეზთან ერთად, სამცხე–ჯავახეთის ადმინისტრაციას დღეს, 30 ოქტომბერს ესტუმრა.

არტაანის გუბერნატორს, მუნიციპალიტეტების მერებს და სავაჭრო-სამრეწველო პალატის თავმჯდომარეს, სამცხე–ჯავახეთის გუბერნატორმა ბესიკ ამირანაშვილმა მოადგილეებთან და რეგიონული პროექტების კოორდინირების სამსახურის უფროსთან ერთად უმასპინძლა.

დაახლოებით ერთ საათიანი შეხვედრა მედიისთვის დახურული იყო. მხარეებმა შეხვედრაზე ტურიზმზე კულტურასა და ასევე, სავაჭრო–ეკონომიკურ საკითხებზე ისაუბრეს. როგორც შეხვედრის დასრულების შემდეგ არტაანის გუბერნატორმა მეჰმეთ ემინ ბილმეზმა განაცხადა რეგიონების სავაჭრო და ეკონომიკური სფეროს განვითარების მიზნით სამცხე–ჯავახეთში ბიზნესფორუმი გაიმართება, თუმცა ზუსტი დრო ჯერ გადაწყვეტილი არ არის.

„მსგავსი ბიზნესფორუმი უკვე იყო არტაანში, რამდენიმე ხნის წინ საქართველომაც უმასპინძლა და ახლა გადავწყვიტეთ კონკრეტულად ამ რეგიონში გაიმართოს, რადგან კარგად გავეცნოთ ადგილობრივ ბიზნესმენებს, გავიგოთ რეგიონის პოტენციალი, შემდეგ ამ მიმართულებით ქმედითი ნაბიჯები გადავდგამთ. ამასთან ერთად მნიშვნელოვანია ტრანს–სასაზღვრო ურთიერთობების განვითარება, რადგან კონკრეტულად ჩემს რეგიონში საქართველოს სამი საბაჟო გამშვები პუნქტი მდებარეობს“,–ამბობს არტაანის გუბერნატორი.

სამცხე–ჯავახეთის ადმინისტრაციის რეგიონული პროექტების კოორდინირების უფროსი მარინა გაჩეჩილაძე ამბობს, რომ შეხვედრაზე რეგიონში ტურიზმის განვითარების შესახება ისაუბრეს –„ჩვენი შეხვედრის ერთ–ერთი საკითხი იყო ტურიზმის განვითარება. ამაზე აქტიურად ვმუშაობთ და მალე იქნება ქმედითი ნაბიჯები. უკვე გვქონდა შეხვედრები არტაანში ,სადაც გავაცანით ჩვენი ტურისტული პოტენციალი“.

მარინა გაჩეჩილაძის თქმით, უკვე წლებია არტაანის გუბერნიასთან მჭიდრო ურთიერთობა აქვთ და მუშაობენ რეგიონების განვითარების კუთხით, ყველა სფეროში.



[ლუბა გიორგაძე, ახალციხე]