გაყინულ ხინკალსა და პელმენში ბაქტერიები აღმოაჩინეს

ახალციხის მომხმარებელთა დახმარების ცენტრს "ბარაქის" ხინკლისა და "კავთურას" პელმენის შემოწმების თხოვნით მომხმარებელმა მიმართა. ცენტრის წარმომადგენლებმა ახალციხეში, კოსტავას ქ N7–ში მდებარე მარკეტში შპს "რაბათელი" და იაძის ქ N7–ში მდებარე ი.მ. დუშნეკ მალხაზიანის კუთვნილ მაღაზიაში გაყინული ხინკალი და პელმენი შეიძინეს. ცენტრის ინფორმაციით, ორივე ნიმუშში აღმოჩნდა ნაწლავის ჯგუფის ჩხირის ბაქტერიები (კოლიფორმები) და ლისტერია მონოციტოგენეზი, რაც საქართველოში მოქმედი სანიტარული ნორმებით, დაუშვებელია.

"აღმოჩენილმა ბაქტერიებმა შეიძლება ადამიანის სერიოზული მოწამვლა გამოიწვიოს. თუმცა, საქართველოში მოქმედ აკრედიტებულ ლაბორატორიებს ამ ბაქტერიებზე სურსათის უფრო ზუსტი კვლევები არა აქვთ დანერგილი, რაც არ გვაძლევს საშუალებას, ცალსახად დავასკვნათ, რომ შემოწმებული სურსათის ნიმუშები მავნეა", – ნათქვამია ახალციხის მომხმარებელთა დახმარების ცენტრის განცხადებაში.

ცენტრის ინფორმაციით, აღმოჩენილი მიკრობები საკვებში სხვადასხვა გზით შეიძლება მოხვდეს, დაწყებული დაბინძურებული ინგრედიენტებიდან, დამთავრებული საკვების მომზადების, შენახვისა ან დისტრიბუცია/რეალიზაციის დროს ჰიგიენის პირობების დაუცველობით. ამავდროულად, ისინი იოლად ნადგურდებიან საკვების თერმული დამუშავებისას (მოხარშვა, შეწვა).

როგორც ახალციხის მომხმარებელთა დახმარების ცენტრის განცხადებაში წერია, დარღვევის შესახებ ეცნობა მომხმარებელს, მწარმოებლებს, მაღაზიის მეპატრონეებსა და სურსათის ეროვნული სააგენტოს სამცხე-ჯავახეთის რეგიონულ სამმართველოს.



[sknews.ge]