ახალციხეში წყაროს წყალში ნაწლავის ჩხირის ჯგუფის ბაქტერიები აღმოჩნდა

ე.წ „თვალის წყალს“ ყოველდღიურად მოიხმარენ ვაჟა–ფშაველასა და იაძის ქუჩის მცხოვრებლები. გარდა ამისა წყაროთი სარგებლობს ამ ქუჩაზე გამვლელი მოსახლეობა.

„ხანდახან სასმელად მიმაქვს. განსაკუთრებით ზაფხულში მოვიხმართ, რადგან ძალიან ცივია“, – ამბობს ვაჟა–ფშაველას ქუჩის მცხოვრები აზა ავეტისიანი, რომელსაც წყლის დაბინძურების შესახებ ინფორმაცია არ აქვს.

წყალში აღმოჩენილი ბაქტერიების შესახებ არაფერი იცის ამავე ქუჩაზე მცხოვრებმა რიმა გოგასიანმაც: „როგორც ვიცი, ამ წყაროთი ყველა სარგებლობს, ძალიან სუფთაა და თვალების სამკურნალოდ იყენებენ“.

მომხმარებელთა დახმარების ცენტრმა წყლის ნიმუში შესამოწმებლად 28 იანვარს აიღო. ლაბორატორიული შემოწმების შედეგად, ნიმუშში აღმოჩნდა ნაწლავის ჩხირის ჯგუფის ბაქტერიები.

„ვაჟა–ფშაველას ქუჩის მაცხოვრებელმა მოგვმართა, ავიღეთ ანალიზები და დავთესეთ. აღმოჩნდა ნაწლავის ჩხირი და მომატებული ნიტრატები. ეს არ არის ქალაქის წყალსადენის წყალი, თვითდინებით მოდის, მაგრამ ჩვენ აუცილებლად შევატყობინებთ წყალმომარაგების კომპანიას, ხომ არ ხდება სადმე დაბინძურება“, – ამბობს ახალციხის მოხმარებელთა დახმარების ცენტრის ხელმძღვანელი ეთერ ზედგინიძე.

„საქართველოს გაერთიანებული წყალმომარაგების კომპანიის“ სამცხე–ჯავახეთის რეგიონული ფილიალის ხელმძღვანელი გიორგი ბაგინაშვილი ამბობს, რომ ამ წყაროს წყალზე პასუხისმგებლობას ვერ აიღებენ.
„ეს არ არის ჩვენს ქსელზე დაერთებული, ცალკე სათავე აქვს. ეს ჩვენი კომპეტენცია არ არის და ამ წყალს არ ვემსახურებით“, – ამბობს ბაგინაშვილი.

მომხმარებელთა დახმარების ცენტრი მოსახლეობას აფრთხილებს, ამ წყაროს წყალი სასმელად არ გამოიყენოს.

[თინათინ ზაზაძე, ახალციხე]