ახალციხის რამდენიმე ბაღში წყალი სასმელად უვარგისია

ახალციხის მომხმარებელთა დახმარების ცენტრის წარმომადგენლებმა, ახალციხის მეხუთე ბაგა–ბაღისა და ახალციხის მუნიციპალიტეტის სოფლების აგარის, აწყურისა და მუსხის ბაგა–ბაღების აღსაზრდელების მშობლების მოთხოვნით, დაწესებულებებში სასმელი წყლის ნიმუშები აიღეს.

„მეხუთე ბაღში ნიმუშის ლაბორატორიული გამოკვლევის შედეგად, მასში გამოვლინდა მიკრობიოლოგიური დარღვევა, რის შესახებაც ეცნობა ახალციხის მუნიციპალიტეტს, გაერთიანებული წყალმომარაგების კომპანიისა და ბაღის ადმინისტრაციას. ერთი კვირის შემდეგ, ბაღის ადმინისტრაციის მოთხოვნის საფუძველზე, ახალციხის მომხმარებელთა დახმარების ცენტრის წარმომადგენლებმა განმეორებით აიღეს წყლის ნიმუში რეაბილიტირებული სისტემიდან. განმეორებითი ლაბორატორიული კვლევის შედეგად დარღვევა აღარ გამოვლენილა", – ნათქვამია ახალციხის მომხმარებელთა დახმარების ცენტრის განცხადებაში.

ამავე დაწესებულების ინფორმაციით, ცენტრის თანამშრომლებმა 2015 წლის 11 ივნისს აიღეს ონკანის წყლის ნიმუში აგარის საბავშვო ბაღიდან და ჭის წყლის ნიმუში აწყურის საბავშვო ბაღიდან, ხოლო 15 ივნისს ონკანის წყლის ნიმუში მუსხის საბავშვო ბაღიდან.

როგორც ახალციხის მომხმარებელთა დახმარების ცენტრში განმარტავენ, ლაბორატორიული შემოწმების შედეგად, ორივე ნიმუშის მიკრობიოლოგიური პარამეტრები ნორმაში აღმოჩნდა, თუმცა, აგარის საბავშვო ბაღიდან აღებული ნიმუშის ნიტრიტების მაჩვენებელი (0,3) მცირედ აღემატება დაშვებულს (<0,2), ხოლო სოფელ მუსხის საბავშვო ბაღის წყალში აღმოჩნდა ნაწლავის ჩხირის ჯგუფის ბაქტერიები.

"დარღვევების შესახებ ცენტრმა აცნობა სურსათის ეროვნული სააგენტოს რეგიონულ სამმართველოს, შესაბიმისი ბაღების ადმინისტრაციებსა და მუნიციპალიტეტების ხელმძღვანელობას", – განმარტავენ მომხმარებელთა დახმარების ცენტრში.

[თამარ თოთაძე, ახალციხე]