ახალციხის მაღაზიებში საკვებად უვარგისი ხაჭო იყიდება

ახალციხის მომხმარებელთა დახმარების ცენტრის ინფორმაციით, თანამშრომლებმა ხაჭოს ნიმუშები ახალციხის ორ და ქალაქ ვალის ერთ მაღაზიაში აიღეს. ნიმუშები შესამოწმებლად ლაბორატორიაში გადაიგზავნა.

„ლაბორატორიიდან მიღებული შედეგების თანახმად, სამივე ნიმუშში აღმოჩნდა ნაწლავის ჩხირის ჯგუფის ბაქტერიები (კოლიფორმები)“, – აცხადებენ მომხმარებელთა დახმარების ცენტრში.

ცენტრის ინფორმაციით, საუბარია შემდეგ მაღაზიებსა და პროდუქტებზე: ქალაქ ვალეში, სტალინის ქ. N24-ში მდებარე ი.მ. ხ. აღლემაშვილის კუთვნილ მაღაზიაში, შპს „ჯორჯიან მილკის“ წარმოებულ ხაჭო „მილკოზე“ (შეფუთული). ქ. ახალციხეში, თამარაშვილის N41-ში მდებარე მაღაზიაში შპს „პეტო“ შეძენილ ხაჭო „ქობულეთურზე“ (ასაწონი). ქ. ახალციხეში, 9 აპრილის ქ. N10-ის მიმდებარედ, ი.მ. ზ. აფრიამაშვილის კუთვნილ მაღაზიაში შეძენილ „სოფლის ნობათის“ ხაჭოზე (შეფუთული).

„დარღვევის შესახებ ეცნობება მეწარმეებს, მაღაზიების მეპატრონეებს, სურსათის ეროვნულ სააგენტოსა და ადგილობრივ მუნიციპალიტეტებს“, – აცხადებენ ორგანიზაციაში.

ორგანიზაციის ინფორმაციით, ცენტრის წარმომადგენლებმა შესყიდვისას დაათვალიერეს პროდუქტების ეტიკეტი და შენახვის ვადა. სამივე შემთხვევაში ნორმაში იყო როგორც ეტიკეტი, ისე ვარგისიანობის ვადა. პროდუქტები მოთავსებული იყო მაღაზიების მაცივრებში.

[sknews.ge]