ახალციხის მაღაზიებში საკვებად უვარგისი ხინკალი და პელმენი ისევ იყიდება

საბარგო სადგურზე, მაღაზიაში შპს „დიაკონაშვილი“, თამარაშვილის ქუჩაზე მდებარე სავაჭრო ცენტრში, ი.მ. ხათუნა ჯავახაძის კუთვნილ მაღაზიაში და ასპინძის ქუჩაზე მდებარე ი.მ. ბარსეგიანის კუთვნილ მარკეტში, შპს „რაჭას“ ხინკალი, შპს „პინოს“ და შპს გიოს წარმოებული ხორცის პელმენი და ხინკალი, მაცივრებში ისევ აწყვია. მაღაზიების მეპატრონეები ამბობენ, რომ ისინი ამ პროდუქტების უვარგისობაზე არავის გაუფრთხილებია.

„პასუხი ხომ უნდა მოსულიყო, მხოლოდ ინტერნეტში, ‘სამხრეთის კარიბჭეს“ სტატიით გავიგეთ. ჩვენ ისევ გავყიდით რაჭულს, სანამ არ მოგვამართავენ ოფიციალურად“, – ამბობს ხათუნა ჯავახაძე, რომლის მაღაზიიდანაც შესამოწმებლად „რაჭას“ ხინკალი წაიღეს.

შეგახსენებთ, ამ სამი მაღაზიიდან პელმენი და ხინკალი შესამოწმებლად ახალციხის მომხმარებელთა დახმარების ცენტრმა 19 თებერვალს შეიძინა. შემოწმების შედეგად, პროდუქტებში ჯანმრთელობისთვის საშიში ბაქტერიები და მიკრობები აღმოჩნდა.

„ნიმუშები ყველა წესის დაცვით ავიღეთ. 2 მარტს მოგვივიდა პასუხი, რომ სამივე წარმოების პროდუქტში აღმოჩნდა ნაწლავის ჩხირის ჯგუფის ბაქტერიები და ლისტერია. ეს ბაქტერიები ბავშვებზე, ორსულებსა და მოზარდებზე ახდენს გავლენას“, – განაცხადა ცენტრის ხელმძღვანელმა ეთერ ზედგინიძემ.

მას შემდეგ, რაც ინფორმაცია გავრცელდა, სამივე მაღაზიიდან აღნიშნული პროდუქტები შესამოწებლად წაიღო სურსათის ეროვნული სააგენტოს სამცხე–ჯავახეთის რეგიონულმა სამმართველომ.

სამმართველოს უფროსის ლია ბექაურის თქმით, რა ზომებს მიიღებენ, იმაზეა დამოკიდებული, რა პასუხი მოვა ლაბორატორიიდან. იქამდე, კი მაღაზიები პროდუქტებს უპრობლემოდ ყიდიან.



[ვარლამ წიკლაური, ახალციხე]