სამცხე–ჯავახეთში მიკრო და მცირე მეწარმეობის პროგრამაზე იმსჯელებენ

შეხვედრები ხვალ, 16 აპრილსაა დაგეგმილი. ვიზიტი ახალქალაქიდან დაიწყება, შეხვედრა 11:00 საათზე, გამგეობის შენობაში გაიმართება. ახალციხეში შეხვედრა 13:00 საათზე, სამცხე–ჯავახეთის სახელმწიფო უნივერსიტეტის შენობაში, ზაზაძის სახელობის დარბაზში შედგება. სამცხე–ჯავახეთში ვიზიტი 17:00 საათზე, ბორჯომში, კულტურის სახლში შეკრებილებთან შეხვედრით დასრულდება.

საქართველოს რეგიონებში მიკრო და მცირე მეწარმეობის ხელშეწყობის პროექტის განხორციელება, პრემიერ-მინისტრის მიერ ინიცირებული პროგრამის „აწარმოე საქართველოში“ ფარგლებში დაიწყო. სამცხე-ჯავახეთში, ქვემო ქართლში, იმერეთში, რაჭა-ლეჩხუმსა და ქვემო სვანეთში პროგრამის განხორციელება 2015 წლის 15 მარტიდან დაიწყო. ამჟამად მიმდინარეობს ბიზნეს იდეების კონკურსი. განაცხადების მიღება www.qartuli.ge ვებ-გვერდის მეშვეობით 2015 წლის 5 მაისამდე გაგრძელდება.

პროექტის ფარგლებში დაინტერესებულ პირებს შესაძლებლობა ეძლევათ:

1. წარადგინონ საკუთარი ბიზნეს-იდეა;
2. გაიღრმავონ ბიზნეს-უნარები;
3. გამოიყენონ შესაძლებლობა და მიიღონ შესაბამისი თანადაფინანსება: 5,000 ლარამდე - 1 მეწარმე; 10,000 ლარამდე - 2 მეწარმე; 15,000 ლარამდე - 3 მეწარმე.

პროგრამის ადგილობრივი მოსახლეობისთვის გაცნობის მიზნით, მეწარმეობის განვითარების სააგენტოს ორგანიზებით, დაგეგმილია საინფორმაციო შეხვედრები საქართველოს რეგიონებში. შეხვედრებში მონაწილეობას მიიღებენ ეკონომიკისა და მდგრადი განვითარების მინისტრის მოადგილე ქეთევან ბოჭორიშვილი, მეწარმეობის განვითარების სააგენტოს დირექტორი გიორგი ციკოლია და რეგიონებში პროგრამის უშუალო განმახორციელებელი ორგანიზაციების წარმომადგენლები. შეხვედრები გაიმართება მოკლე პრეზენტაციისა და კითხვა-პასუხის ფორმატით.

საქართველოს მასშტაბით შეხვედრები 21 აპრილამდე გაგრძელდება.

[ნინო ნარიმანიშვილი, ახალციხე]