რას სთავაზობს მიკრო და მცირე მეწარმეებს სახელმწიფო – შეხვედრა ახალციხეში

შეხვედრა სამცხე–ჯავახეთის უნივერსიტეტის მეორე კორპუსში, საკონფერნციო დარბაზში, 11:00 საათზე დაიწყება.

შეგახსენებთ, მიკრო და მცირე მეწარმეობის ხელშეწყობის ინიციატივა სახელმწიფო პროგრამის „აწარმოე საქართველოში“ ფარგლებში ხორციელდება. პროგრამის მიზანია რეგიონებში მიკრო და მცირე ბიზნესის განვითარება, მეწარმე სუბიექტების მხარდაჭერისა და რეგიონული ბაზრების განვითარების გზით.

პროგრამის ფარგლებში პირს შეუძლია წარადგინოს ბიზნეს იდეა და სახელმწიფოსგან მიიღოს 5.000–დან 15.000 ლარამდე დაფინანსება.

15 თებერვლიდან ამ პროგრამის მეორე რაუნდი დაიწყო. დაინტერესებულ პირს შეუძლია იდეა წარადგინოს ვებ–გვერდზე qartuli.ge. ბიზნეს იდეის წარდგენა შესაძლებელია ა.წ 31 მარტამდე.

კონკურსში ჩართვის შესაძლებლობა აქვს პირს, რომელიც არის სრულწლოვანი (18 წელს მიღწეული) , არის საქართველოს მოქალაქე , არ არის საჯარო მოხელე, არ არის სსიპ მეწარმეობის სააგენტოს თანამშრომელი ან მისი ოჯახის წევრი, არ გააჩნია მიმდინარე ვადაგადაცილებული საგადასახადო ვალდებულება სახელმწიფოს წინაშე განაცხადის შეტანის მომენტში და აცხადებს მზაობას ბიზნეს გეგმების კონკურსში გამარჯვების შემთხვევაში, დარეგისტრირდეს გადასახადის გადამხდელ ფიზიკურ პირად.

პროექტს საქართველოს ეკონომიკის სამინისტროსთან არსებული მეწარმეობის განვითარების სააგენტო ახორციელებს. სამინისტროს ინფორმაციით, მიკრო და მცირე მეწარმეობის ხელშეწყობის პროექტის მეორე რაუნდში იგეგმება მინიმუმ 1500 ბენეფიციარის დაფინანსება და 3000-მდე ბენეფიციარის გადამზადება. პირველი რაუნდის ფარგლებში დაფინანსდა 1620 ბენეფიციარი და ტრენინგი გაიარა 3118–მა ბენეფიციარმა.

[ნინო ნარიმანიშვილი, ახალციხე]