მიკრო და მცირე მეწარმეობის ხელშეწყობის პროექტის მეორე რაუნდი იწყება

მიკრო და მცირე მეწარმეობის ხელშეწყობის პროგრამის მეორე რაუნდში მინიმუმ 1500 ბენეფიციარი დაფინანსდება და გადამზადდება 3000-მდე ბენეფიციარი. ბიზნეს იდეების რეგისტრაცია შესაძლებელია ვებგვერდზე: www.qartuli.ge

პროგრამა ითვალისწინებს ერთ მეწარმე სუბიექტზე დაფინანსების მაქსიმალურ თანხას 5000 ლარის ოდენობით, ორი მეწარმე სუბიექტის გაერთიანების შემთხვევაში - არაუმეტეს 10 000 ლარისა, ხოლო სამი მეწარმე სუბიექტის გაერთიანების შემთხვევაში - 15 000 ლარს, ბენეფიციარისთვის გადაცემული თანხის მინიმუმ 20%-იანი თანხობრივი თანამონაწილეობით.

რაც შეეხება პირველი რაუნდის შედეგებს, ამ ეტაპზე დაფინანსებულია 1620 ბენეფიციარი, ტრენინგი გაიარა 3118–მა ბენეფიციარმა.
გაფორმებულია 218 ხელშეკრულება, რომლებიც დაფინანსდებიან უახლოეს მომავალში, რადგან პროექტში ჩართვისას ბენეფიციარი ხარჯავს საკუთარი თანამონაწილეობის თანხას და მხოლოდ ამის შემდეგ იღებს დაფინანსებას სახელმწიფოს მხრიდან.

საერთო ჯამში, პირველი რაუნდის შედეგად დაფინანსდება 1770-მდე ბენეფიციარი.

საქართველოში მიკრო და მცირე მეწარმეობის ხელშეწყობის სახელმწიფო პროგრამა 2015 წელს დაიწყო. პროგრამის მიზნებია: რეგიონული ბიზნესის კონკურენტუნარიანობის ზრდა; შემოსავლების ათვისება; თანამედროვე ბიზნესპრაქტიკის დამკვიდრება; დამატებითი სამუშაო ადგილების შექმნა და რეგიონის მკვიდრთა შემცირებული მიგრაცია. პროგრამის ბიუჯეტი 20 მილიონი ლარია, ხანგრძლივობა კი 26 თვე. პროგრამა 2017 წლის ზაფხულში უნდა დასრულდეს.

[sknews.ge]