“ახალი მემარჯვენეები” დღეს სამცხე-ჯავახეთს ესტუმრნენ

გამყრელიძის განცხადებით, ამ ეტაპზე გლეხებისთვის მთავარი პრობლემა მოსავლის რეალიზაციაა და ისინი სწორედ ამ კუთხით გეგმავენ მუშაობას.

”საქართველოში ძირითადად თურქული კარტოფილი იყიდება, რომელიც არც ხარისხით ვარგა და არც გემოთი. ეს დამოკიდებულება თუ არ შევცვალეთ და ხალხს თუ არ მივეხმარეთ, რომ ახალციხის და ახალქალაქის კარტოფილი იყოს ყველაზე მეტად რეალიზებადი, მაშინ ცოტა ხანში ყველა დაანებებს თავს კარტოფილის მოყვანას და კარტოფილის იმპორტიც გახდება ასპროცენტიანი, როგორც ეს ხდება ქათმის, ღორის ხორცზე და სხვა პროდუქტებზე” , - აცხადებს გამყრელიძე და ამატებს, რომ ამ დღით მათ პროტესტი გამოუცხადეს სახელმწიფოს მხრიდან გლეხებისადმი დამოკიდებულებას.

თამაზ მარტინენკო ამბობს, რომ მოსავალით კმაყოფილია, თუმცა რეალიზაციის იმედი არ აქვს: ”სოფელში უმრავლესობა კარტოფილს ვთესავთ, მაგრამ გაყიდვა გვიჭირს. ბაზარზე ერთი კილოგრამი 40 თეთრი ღირს. თურქეთიდან შემოტანილ კარტოფილს ახალციხის კარტოფილად ასაღებენ და ჩვენ კარტოფილს არავინ ყიდულობს”.

ახალი მემარჯვენეების წარმომადგენლები საარჩევნო პროგრამის ფარგლებში უკვე შეხვდნენ წინუბნის, გურკელისა და აგარის მოსახლეობას და წინასაარჩევნო პროგრამა გააცნეს. უახლოეს მომავალში შეხვედრას ახალციხის მოსახლეობასთანაც გეგმავენ.

[თინათინ ზაზაძე, ახალციხე]