მესხ ფერმერებს სათესლე კარტოფილის ახალი ჯიშები გააცნეს

მარკიზი, ამბიშენი, მუსტანგი, სინორა, ფალუკა, არიზონა, სავიოლა და დესტინი - იმ ჯიშების ჩამონათვალია, რომელიც კომპანია „აგრიკომ“ გამოიყვანა. კომპანიაში ამბობენ, რომ ყველა ეს სახეობა რეგიონის კლიმატზე მორგებული და უხვმოსავლიანია.

„აგრიკოს“ გაყიდვების მენეჯერის იან დეკერის განმარტებით, მუსტანგი, სინორა და დესტინი ჩიფსების მოსამზადებლადაც გამოიყენება.

ახალციხის სასოფლო-საკონსულტაციო სამსახურის დირექტორი გურამ ჯინჭველაძე ამბობს, რომ ადგილობრივი ფერმერების უმრავლესობა კარტოფილის თესავს, ამიტომ დღევანდელი შეხვედრა მათთვის ნაყოფიერი იყო.

მისივე თქმით, ფერმერები წლებია აღნიშნული კომპანიის მიერ გამოყვანილ კარტოფილს თესავენ და კარგ მოსავალსაც იღებენ: "ახლა სწორედ ის დროა, როცა მოსავლის დაბინავება სრულდება და იწყება მომავალ წელზე ფიქრი. ფერმერები უნდა ჩამოყალიბდნენ, რომელი ჯიშის კარტოფილი დათესონ. შესაბამისად, ჩვენც ვემზადებით, რომ მათგან მივიღოთ შეკვეთები და დროულად მივაწოდოთ თესლი“.

ფერმერმა ბესო გოგსაძემ საკუთარ ნაკვეთში უკვე გამოსცადა ჰოლანდიური ჯიშის სათესლე კარტოფილი. ამბობს, რომ ახლა ახალი ჯიშის დათესვის სურვილი გაუჩნდა.

„სამომავლოდ სავიოლას დავთესავ, რომელიც დღეს წარმოადგინეს. როგორც ჩანს, უხვი მოსავლით და გემური თვისებებით გამოირჩევა“, - ამბობს იგი.

მსგავსი შეხვედრა დღეს ასპინძაშიც გაიმართა.

[მანანა სარაშვილი, ახალციხე]