ახალციხეში ფერმერს იასამნისფერი კარტოფილი მოჰყავს

იასამნისფერი კარტოფილის სამშობლო ჩილეა, ჩვეულებრივი კარტოფილისგან კი სასარგებლო თვისებებით და ფასით განსხვავდება. შეიცავს B ჯგუფის ვიტამინებს, ხელს უწყობს წნევის დარეგულირებას, აუმჯობესებს მხედველობას და აძლიერებს იმუნურ სისტემას.

განსხვავებული ფერი კი მასში არსებული ნივთიერება, ანტოციანის დამსახურებაა.

კარტოფილი ორგანული სოფლის მეურნეობის მწარმოებელ კომპანიაში „ბარბალეში“ მოჰყავთ.

„ერთი კილო იასამნისფერი კარტოფილი ექვსი ლარი ღირს. ახალციხეში არ იყიდება რადგან ძვირია. კარტოფილის ყიდვა მსურველს შეუძლია თბილისში, მარიჯანის ქუჩაზე არსებულ ბაზრობაზე, ან შეუკვეთონ. ევროპაში ეს კარტოფილი მეცხრამეტე საუკუნიდან აქვთ“,- ამბობს „ბარბალეს“ ერთ–ერთი დამფუძნებელი გაგა მუმლაძე.

მისივე თქმით, იასამნისფერი კარტოფილი ჩვეულებრივისგან გემოთი არ განსხვავდება. იგივეა მოვლის ტექნოლოგიაც: „ზოგადად ძალიან სასარგებლოა და მინდა აღვნიშნო, რომ შესანიშნავი პიურე მზადდება“.

„ბარბალემ“ წელს იასამნისფერი კარტოფილის ერთი ტონა მოსავალი აიღო. თესლს არ ჰყიდიან. გაგა მუმლაძის თქმით, თბილისში მათი პროდუქცია მოთხოვნადია, რადგან ეკოლოგიურად სუფთაა.

კომპანიას სულ ხუთი სახეობის ორგანული კარტოფილი აქვს. საკუთარი პროდუქციის ქვეყნის საზღვრებს გარეთ გატანას ჯერჯერობით არ გეგმავენ.



[მარიამ ბარძიმაძე, ახალციხე]