ბორჯომში 9 აპრილის სკვერში პარაკლისი გადაიხადეს

9 აპრილის სკვერში ადგილობრივი თვითმმართველობის წარმომადგენლები და მოქალაქეები დილიდან შეიკრიბნენ. მათ 1989 წლის 9 აპრილს დაღუპულთა ხსოვნას პატივი მიაგეს.

ადგილობრივი ხელისუფლების წარმომადგენლებმა 9 აპრილის მემორიალი გვირგვინითა და ყვავილებით შეამკეს. ბორჯომ-ბაკურიანის ეპარქიის მიტროპოლიტმა სერაფიმემ კი პარაკლისი გადაიხადა და ამ დღის ისტორიულ მნიშვნელობაზე ისაუბრა.

ბორჯომის მუნიციპალიტეტის გამგებლის დიმიტრი ყიფიანის განცხადებით, ქართველ ხალხს ყოველთვის უნდა ახსოვდეს იმ გმირების უდიდესი პატრიოტიზმი და თავდადება, რომლებმაც საკუთარი სიცოცხლე სამშობლოს დამოუკიდებლობას შესწირეს.

„9 აპრილი თითოეული ადამიანისათვის უდიდესი ტკივილია და ამავე დროს, ეს დღე ნათელი მაგალითია, თუ რაოდენ ფასეულია საკუთარი სამშობლო“, - აღნიშნა დიმიტრი ყიფიანმა.

[თამარ თოთაძე, ბორჯომი]