პარაკლისით, გვირგვინებითა და 'მრავალჟამიერით' ახალციხეში 9 აპრილი აღნიშნეს

სამცხე-ჯავახეთის სამხარეო ადმინისტრაციის, ადგილობრივი თვითმმართველობის, „ქართული ოცნებისა“ და ახალციხის ციხის წარმომადგენლებმა და ახალციხის მცხოვრებლებმა 9 აპრილის მემორიალი გვირგვინებით შეამკეს.


ახალციხის მუნიციპალიტეტის საკრებულოს თავმჯდომარე მალხაზ ასპანიძე.

დაღუპულთა მოსახსენიებელი პარაკლისი კი დეკანოზმა იოანე გელაშვილმა გადაიხადა.

„9 აპრილი დიდი ტრაგედია იყო ჩვენი ერისთვის, მაგრამ იმ დროს დაიწყო ჩვენი ქვეყნის გამოღვიძება და დაიწყო ბრძოლა დამოუკიდებლობისთვის. 9 აპრილი უნდა ახსოვდეს თითოეულ ქართველს და მომავალ თაობას გადავცეთ ეს ისტორია“, - განაცხადა დეკანოზმა იოანე გელაშვილმა.


დეკანოზი იოანე გელაშვილი

პარაკლისის შემდეგ, ფოლკლორულმა ანსამბლმა "მესხეთმა" "მრავალჟამიერი" შეასრულა. სახალხო მთქმელმა ვასილ კვინცხაძემ კი ლექსი წაიკითხა. ღონისძიება ახალციხის მუნიციპალიტეტის გამგეობის კულტურის სამსახურის ორგანიზებით გაიმართა.


ფოლკლორული ანსამბლი 'მესხეთი'.

ზუსტად 25 წლის წინ, თბილისში, დილის 04.00. საათზე, შოთა რუსთაველის გამზირზე, მაშინდელი მთავრობის სასახლის წინ, საბჭოთა კავშირის სპეციალური დანიშნულების რაზმმა მშვიდობიანი მიტინგი სასანგრე ნიჩბების, ხელკეტებისა და გაზის გამოყენებით დაარბია. მიტინგის დაშლისას ადგილზე 21 მოქალაქე დაიღუპა.

„მათი სახელები ოქროს ასოებით შევა საქართველოს ისტორიაში. ამ ადამიანებმა ბიძგი მისცეს ერის გამოღვიძებას. სამწუხაროა, რომ ასე ტრაგიკულად შეეწირნენ“, - აღნიშნა სამცხე-ჯავახეთის გუბერნატორმა აკაკი მაჭუტაძემ.


სამცხე-ჯავახეთის გუბერნატორი აკაკი მაჭუტაძე


[თამარ თოთაძე, ახალციხე]