ახალი წიგნები მაკულატურის სანაცვლოდ – აქციაში ახალციხე ჩაერთო

„დემოკრატ მესხთა კავშირი“ მაკულატურას სამცხე–ჯავახეთის მასშტაბით აგროვებს. „პალიტრა მედიის“ აქცია მაკულატურის წიგნებში გადაცვლას გულისხმობს: 1 კგ მაკულატურა 1 ლარის ღირებულების წიგნს უდრის.

ორგანიზაცია მაკულატურის სანაცვლოდ მიღებულ წიგნებს ახალციხის მეშვიდე საჯარო სკოლის მოსწავლეებსა და სოციალურად დაუცველ ბავშვებს გადასცემს. რეგიონში მაკულატურის შეგროვების იდეა, ბავშვების დახმარების მიზნით, „დემოკრატ მესხთა კავშირში“ არსებულ ახალგაზრდულ ჯგუფს ეკუთვნის.

„ახალგაზრდებმა დახმარება გვთხოვეს ტრანსპორტირებაში, ანუ შეგროვილი მაკულატურის ოფისამდე მოტანასა და შემდეგ მის თბილისამდე ჩატანაში. ასევე ერთი ტონა მაკულატურით შეძენილ წიგნებს თბილისიდან ახალციხემდე ჩამოტანაც უნდა“, – ამბობს „დემოკრატ მესხთა კავშირის“ ხელმძღვანელი გია ანდღულაძე.

აღნიშნული ინიციატივით ორგანიზაცია უკვე დაუკავშირდა ადგილობრივ და საერთაშორისო არასამთავრობო ორგანიზაციების, მედია საშუალებების, საჯარო სკოლების, რესურსცენტრების წარმომადგენლებს. აქციაში უკვე ჩაერთო ბორჯომის მუნიციპალიტეტის გამგეობა, რესურსცენტრი, საჯარო სკოლები და კავკასიის გარემოსდაცვითი არასამთავრობო ორგანიზაცია CENN-ი.

ამ დროისთვის „დემოკრატ მესხთა კავშირში“ 600 კგ მაკულატურა უკვე შეგროვდა. როგორც ორგანიზაციაში აცხადებენ, დღის ბოლომდე 200 კგ–ს კიდევ დაამატებენ. უახლოეს ორ დღეში გამოუყენებელ წიგნებს, ფურცლებსა და ჟურნალებს კიდევ შეაგროვებენ, რაც საერთო ჯამში დაახლოებით ერთ ტონა გახდება.

ვისაც მაკულატურა აქვს და სურს, რომ მის ნაცვლად სპეციალური საჭიროების მქონე ბავშვებმა, ან სოციალურად დაუცველებმა, წიგნები მიიღონ, ორგანიზაციას უნდა დაუკავშირდეს. მათ უნდა დარეკონ ნომერზე: 0365 22 12 23;

აქცია დედამიწის დღესთან დაკავშირებით, 28 მარტიდან 3 აპრილამდე მიმდინარეობს;

[თამუნა უჩიძე, ახალციხე]