ადიგენში ავტოსაგზაო შემთხვევას 28 წლის გოგონა ემსხვერპლა

შემთხვევა დაახლოებით, დილის 09:00 საათზე მოხდა. „ოპელის“ მარკის ავტომობილის მძღოლმა მანქანის გზაზე შემხვედრ პირუტყვისგან აცილება სცადა, ამ დროს მოსრიალდა და ხეებს შეეჯახა.

შემთხვევის დროს ავტომობილში სამი მგზავრი იმყოფებოდა, მძღოლი, მისი 5 წლის შვილი და მეგობრის მეუღლე, 28 წლის გოგონა. გოგონა და მძღოლის შვილი უკანა სავარძელზე ისხდნენ, გოგონა ადგილზე გარდაიცვალა.

როგორც კლინიკა „იმედში“ აცხადებენ, გოგონა კლინიკაში უკვე გარდაცვლილი მიიყვანეს. 5 წლის მოზარდს ამ დრომდე გამოკვლევები უტარდება. მას თავის ქალის ტრამვა აქვს მიღებული. ექიმები ბავშვის მდგომარეობის შესახებ კომენტარს არ აკეთებენ.

ახლობლებმა გვითხრეს, რომ ბავშვის მდგომარეობა დამაკმაყოფილებელია, თუმცა კატარსტროფის მედიცინის ცენტრს ელოდებიან და ბავშვი თბილისში უნდა გადაიყვანონ.

„როგორც ექიმები გვეუბნებიან, არაფერი საგანგაშო არ არის“, – ამბობს 5 წლის ბავშვის ახლობელი ირინა ხეჩაშვილი.

„ბავშვი ვნახე და ძინავს, ახლა ჩამოვედი, დანარჩენი არაფერი ვიცი“, – გვითხრა ბავშვის დედამ.

სამივე მგზავრი ადიგენის მუნიციპალიტეტის სოფელ უდის მკვიდრია. ავტომანქანა უდიდან ახალციხის მიმართულებით მოძრაობდა.

„სამსახურში მოვდიოდი, თან ჩემი 5 წლის შვილი და ძმაკაცის მეუღლე მომყავდა. გზაზე საქონელი გადმომიხტა. ვცადე ამეცილებინა, გზა სველი იყო, მეტი არაფერი მახსოვს“, – ამბობს ავტომანქანის მძღოლი დავით მაისურაძე.

მაისურაძეს ამ დროისთვის სამედიცინო დაწესებულებაში გამოკვლევები უტარდება. გარდაცვლილი კი პროზექტურაშია გადასვენებული.

საქართველოს შინაგან საქმეთა სამინისტროში განმარტავენ, რომ გამოძიება სსკ-ის 276–ე მუხლით მიმდინარეობს. რაც ტრანსპორტის მოძრაობის უსაფრთხოების ან ექსპლუატაციის წესის დარღვევა გულისხმობს, რამაც ადამიანის სიცოცხლის მოსპობა გამოიწვია. კლინიკაში ამ დრომდე რჩებიან სამართალდამცველები.

[თინათინ ზაზაძე, ადიგენი]