ახალქალაქის პოლიციის თანამშრომელმა ავარიით მოქალაქე იმსხვერპლა

ავტოსაგზაო შემთხვევა ახალქალაქის გზატკეცილზე, გზის სავალი ნაწილიდან მოშორებით, 27 მარტს მოხდა. სამცხე–ჯავახეთის უნივერსიტეტის ყოფილი და მოქმედი თანამშრომლების განცხადებით, აბრამიანს მანქანა გაუფუჭდა და გზიდან გადააყენა.

„თავად გზის მეორე მხარეს მანქანის ნაწილის საყიდლად გადავიდა, ამ დროს კი პოლიციის თანამშრომელმა, გამომძიებელმა ბურჯანაძემ საკუთარი მანქანით დაარტყა. მერუჟანი ადგილზე გარდაიცვალა“, – ამბობს პროფესორი როინ ყავრელიშვილი.

მომხდარს თვითმხილველებიც ჰყავს. შემთხვევის დროს აბრამიანის მანქანაში მისი თანამშრომლები და მეუღლე ისხდნენ.

„ბურჯანაძე პოლიციას მაშინვე ჩაბარდა“, – ამბობს ყავრელიშვილი.

შინაგან საქმეთა სამინისტროში აცხადებენ, რომ 27 მარტს ახალქალაქის გზაზე მომხდარ ავტოსაგზაო შემთხვევასთან დაკავშირებით გამოძიება სსკ-ის 276-ე მუხლის მეხუთე ნაწილით მიმდინარეობს. კითხვები პოლიციის თანამშრომელ ბურჯანაძესთან დაკავშირებით, სამინისტრომ უპასუხოდ დატოვა.

მერუჟან აბრამიანი 1976 წლიდან 2007 წლამდე ახალქალაქის მრავალდარგოვანი პროფესიული სასწავლებლის დირექტორი იყო. 2002– 2007 წლებში ჯავახეთის ფილიალის დირექტორის მოადგილედ მუშაობდა. 2007 წლიდან 2012 წლამდე ახალქალაქის უმაღლესი საგანმანათლებლო დაწესებულება კოლეჯის ხელმძღვანელი იყო, 2012 წლიდან დღემდე სამცხე–ჯავახეთის უნივერსიტეტის ადმინისტრაციის ხელმძღვანელის მოადგილედ მუშაობდა.

მერუჟან აბრამიანს მშობლიურ სოფელში, ბარალეთში, დღეს დაკრძალავენ.

[თამუნა უჩიძე, ახალციხე]