„მცირემიწიან ფერმერთა ხელშეწყობის პროექტი" დაიწყო

სოფლის მეურნეობის სამინისტროს ინფორმაციით, პროექტი ქვემო ქართლის და კახეთის რეგიონიდან დაიწყება. ბარათები უკვე იბეჭდება შპს "კაბადონში". სასოფლო სამეურნეო ბარათების დარიგება 3 თებერვლიდან მარნეულის, გარდაბნის, დედოფლისწყაროსა და სიღნაღის მუნიციპალიტეტებიდან დაიწყება.

როგორც სამინისტროში აცხადებენ, „მცირემიწიან ფერმერთა 2014 წლის საგაზაფხულო სამუშაოების ხელშეწყობის პროექტის“ მიზანი მცირემიწიანი ფერმერების მაქსიმალური ხელშეწყობაა. შესაბამისად, სახელმწიფო მათ ყველაზე ენერგოტევად და მნიშვნელოვან სამუშაოებში - ხვნის პროცესში ეხმარება.

პროექტის ბიუჯეტი 90 მილიონამდე ლარს შეადგენს. პროექტს სახელმწიფო ბიუჯეტი და ა(ა)იპ სოფლისა და სოფლის მეურნეობის განვითარების ფონდი აფინანსებს, ხოლო ა(ა)იპ სოფლის მეურნეობის პროექტების მართვის სააგენტო ახორციელებს.

პროექტის დაწყებამდე მუნიციპალიტეტებში სიებს აზუსტებდნენ.გადამოწმებული სიების მიხედვით, 2014 წლის საგაზაფხულო სამუშაოების ხელშეწყობის პროექტით წელს დაახლოებით 800,000-მდე მცირემიწიანი ფერმერი ისარგებლებს.

პროექტის ბენეფიციარები იქნებიან ფერმერები, რომელთაც საკუთრებაში, სარგებლობაში ან ფაქტობრივ მფლობელობაში გააჩნიათ 1.25 ჩათვლით ჰექტარის ფართობის სასოფლო–სამეურნეო დანიშნულების მიწის ნაკვეთები, რომლებსაც ერთწლიანი ან მრავალწლიანი კულტურების წარმოებისთვის იყენებენ.

სამინისტროს ინფორმაციით, ბენეფიციარები წელს ისარგებლებენ ორი ტიპის ბარათით: 1) ნიადაგის ხვნის სამუშაოებისათვის დარიგდება სასოფლო–სამეურნეო ბარათი (ხვნის ბარათი, 2013 წლის პროექტით გათვალისწინებულის ანალოგიური), 2) სასოფლო-სამეურნეო საქონლის მისაღებად, გასული წლისგან განსხვავებით, წელს ფერმერები ისარგებლებენ საბანკო პლასტიკური ბარათით, ე.წ. „აგრობარათით“, რომლითაც მათ შესაძლებლობა ექნებათ სასურველი პროდუქტი მიიღონ ნაწილ–ნაწილ, სხვადასხვა დროს და სხვადასხვა მიმწოდებლისგან.

[sknews.ge]