ხვნის ბარათების გამოყენების ვადა გახანგრძლივდა

"მცირემიწიან ფერმერთა 2015 წლის საგაზაფხულო სამუშაოების ხელშეწყობის პროექტის" ფარგლებში ფერმერებს სასოფლო–სამეურნეო ბარათების გამოყენების საშუალება მიმდინარე წლის 1 დეკემბრამდე ჰქონდათ. თუმცა, სოფლის მეურნეობის სამინისტროს სამცხე–ჯავახეთის რეგიონული სამმართველოს მოთხოვნით, ბარათებით სარგებლობის ვადა 20 დეკემბრამდე განახგრძლივდა.

"ამინდების გამო მიწის დამუშავება ვერ მოახერხეს, წვიმები იყო, ფაქტობრივად, მთელი ოქტომბერი გაცდა და ნოემბერში მოუწიათ დახვნა", – ამბობს სოფლის მეურნეობის სამინისტროს სამცხე–ჯავახეთის რეგიონული სამმართველოს უფროსი ნანა ზუბაშვილი.

შეგახსენებთ, რომ "მცირემიწიან ფერმერთა საგაზაფხულო სამუშაოების ხელშეწყობის პროექტი" მესამე წელია მიმდინარეობს. უკვე ცნობილია, რომ მთავარობა აღნიშნულ პროექტს 2016 წელსაც განახორციელებს.

[თამარ თოთაძე, ახალციხე]