ახალციხის გამგეობაში გასაუბრებას 75 აპლიკანტი გაივლის

ახალციხის გამგეობაში ტესტირებაზე 205 კონკურსანტიდან 117 აპლიკანტი გამოცხადდა, აქედან 36 ქულაზე მეტი მხოლოდ 40 – მა კონკურსანტმა აიღო.

როგორც ახალციხის მუნიციპალიტეტის გამგეობაში აცხადებენ, კონკურსის მესამე ეტაპს, გასაუბრებას, 75 კონკურსანტი გაივლის.

„ტესტირება წარმატებით 40 – მა კონკურსანტმა გაიარა, შესაბამისად ეს აპლიკანტები გასაუბრებასაც გაივლიან. თუმცა ამას ემატებიან ის კონკურსანტები, რომლებმაც წინა ტესტირებაზე გამსვლელი ქულა აიღეს, თუმცა გასაუბრება ვერ გაიარეს. მათ წარმოადგინეს შესაბამისი ცნობა და გასაუბრებას ტესტირების გარეშე გაივლიან“, – ამბობს ახალციხის მუნიციპალიტეტის გამგეობის ადმინისტრაციის სამსახურის უფროსი ილია ზარდიაშვილი.

საჯარო მოხელეთა შესარჩევი კონკურსის ბოლო ეტაპი – გასაუბრება 1 მაისიდან დაიწყება.

შეგახსენებთ, რომ ახალციხის თვითმმართველობაში საჯარო მოხელეთა შესარჩევი კონკურსი მიმდინარე წლის 25 თებერვალს დაიწყო. გამგეობამ 29 ვაკანსია გამოაცხადა, საკრებულომ კი 2. საბუთების მიღება 6 მარტს დასრულდა.

გამგეობაში ყველაზე მოთხოვნადი აღმოჩნდა საქმისწარმოებისა და საარქივო დოკუმენტაციის დამუშავების საკითხებში წამყვანი სპეციალისტის პოზიცია. ამ ვაკანსიაზე 59 განაცხადი შევიდა. 42 განაცხადი შევიდა გამგებლის მდივნის ადგილას, 37 კი საორგანიზაციო საკითხებში წამყვანი სპეციალისტის პოზიციაზე.
საკრებულოში შესული 83 განაცხადიდან, 37 შევიდა საორგანიზაციო საკითხებში მთავარი სპეცილისტის პოზიციაზე, 46 კი საორგანიზაციო საკითხებში წამყვან სპეციალისტის ვაკანსიაზე.

ახალციხის გამგეობაში ტესტირება 18 და 19 აპრილს ჩატარდა. ტესტირება ახალციხის პირველ და მეხუთე საჯარო სკოლებში მიმდინაროებდა, რომელსაც გამოცდების ეროვნული ცენტრის წარმომადგენლები აკვირდებოდნენ.

[მანანა სარაშვილი, ახალციხე]