ადიგენის გამგეობაში საჯარო მოხელეთა შესარჩევი კონკურსი მესამედ ცხადდება

პირველ ეტაპზე, ადიგენის მუნიციპალიტეტის გამგეობაში, საჯარო მოხელეთა შესარჩევი კონკურსი 2014 წლის ნოემბრის თვეში, 32 ვაკანტურ პოზიციაზე გამოცხადდა. კონკურსი, წარმატებით 18–მა კანდიდატმა გიარა,14 ადგილი ვაკანტური დარჩა.

„მეორე ეტაპზე, კონკურსი 14 ვაკანსიაზე გვქონდა გამოცხადებული. ამას დაემატა ერთი პოზიცია – საორგანიზაციო საკითხებში წამყვანი სპეციალისტის, რომელიც სამთვიანი გამოსაცდელი ვადით იყო აყვანილი და აღნიშნული პერიოდი გასული არ იყო“ , – აცხადებენ ადიგენის გამგეობაში.

მეორედ ჩატარებულ კონკურსზე, 15 ვაკანტური ადგილიდან, საკონკურსო–საატესტაციო კომისიამ კადრი 9 პოზიციაზე შეარჩია.

გამგეობის ადმინისტრაციული სამსახურის მთავარი სპეციალისტის პოზიციაზე, საორგანიზაციო და საზოგადოებასთან ურთიერთობის საკითხებში – მამუკა კალანდაძე დაინიშნა;
არქიტექტურისა და მშენებლობის სამსახურის წამყვანი სპეციალისტის პოზიციაზე – ირაკლი მინაძე;
კონკურსის წარმატებით გავლის შემდეგ გამარჯვებულები შეირჩა 7 ტერიტორიულ ორგანოში:
გორგულის ადმინისტრაციულ ერთეულში გამგებლის წარმომადგენელი გიორგი სოფრომაძე გახდა;
ჭეჭლის ადმინისტრაციულ ერთეულში – თეიმურაზ ბლიაძე;
ლელოვნის ადმინისტრაციულ ერთეულში – გოჩა ჯანელიძე;
უდის ადმინისტრაციულ ერთეულში – ივანე გზირიშვილი;
ჩორჩნის ადმინისტრაციული ერთეულში – ზაზა ტაბატაძე;
არალში – დავით აკოფაშვილი;
ზანავში – გივი ანძაველიძე;

ბარიერი ვერ გადალახეს სოფლების: მოხის, ზედუბანის, ბოლაჯურის, ფხეროს, დაბა ადიგენისა და ზარზმის ადმინისტრაციული ერთეულის კონკურსანტებმა.

„ხელახალი კონკურსი სავარაუდოდ სამშაბათს გამოცხადდება“, – განმარტავს ადიგენის მუნიციპალიტეტის გამგეობის საკონკურსო–საატესტაციო კომისიის მდივანი, იურიდიულ საკითხთა კომისიის თავმჯდომარე მუხრან ხარშილაძე.

[თინათინ ზაზაძე, ადიგენი]