ნაზი მულაძე ადიგენის მუნიციპალიტეტის სოფელ უდეში ცხოვრობს. ამბობს, რომ სოფლიდან ახალციხის მიმართულებით ყოველდღიურად მგზავრობს და ხშირად ‘მარშუტკაში’ ფეხზე დგას: „საშინელი სივიწროვე და ჭყლეტვაა. არის მარშუტკები, რომლებიც ძალიან ბინძურია, ხელის მოკიდებაც არ შეიძლება მგზავრობის დროს. ბევრჯერ გავაპროტესტეთ, მაგრამ არ ითვალისწინებენ“.
მგზავრობით უკმაყოფილოა არალში მცხოვრები მოსახლეობაც.
„დიდი სოფელია და ერთი პატარა „მარშუკტა“ არ არის საკმარისი. ხშირად გადატვირთული მიდის სოფლიდან და საფრთხის შემცველია“, – ამბობს არალში მცხოვრები ნარგიზა კაჭკაჭაშვილი.
„ვფიქრობ უფრო დიდი ავტობუსი უნდა დანიშნონ ამ ხაზზე“, – კაჭკაჭაშვილს ეთანხმება თანასოფლელი თამარ ტატალაშვილი.
უდისა და არლის მოსახლეობის გარდა, აღნიშნული ტრანსპორტით სოფლების: ზაზალოსა და წარბასთუმნის მოსახლეობაც მგზავრობს.
„წარბასთუმნიდან კილომეტრზე მეტი გვიწევს ფეხით ჩამოსვლა. „მარშუტკაში“ კი იმდენი ხალხია ხშირად ვერ მივყვებით. განსაკუთრებით ბევრი ხალხი დილის და საღამოს საათებშია“, – ამბობს წარბასთუმანში მცხოვრები ნუნუ ჯინიუზაშვილი.
უდის მცხოვრებლები ამბობენ, რომ არაერთგზის პროტესტის მიუხედავად, მათ მდგომარეობას არავინ ითვალისწინებს. ამიტომ, საქმეში ჟურნალისტები ჩართეს.
„მგზავრები სანამ ახალციხეში ჩავლენ, ამ დახშული ტრანსპორტით ოფლსა და სიმყრალეში იმყოფებიან, ხდება შემთხვევები, როცა მგზავრი უგონოდ გამოუყვანიათ გარეთ. იმ დროს, როცა ასეთი უჰაერობაა, არც ისაა გამორიცხული, ბევრი მგზავრთაგანი იყოს დაავადებული და ასე მჭიდროდ მდგომნი ერთი მეორის ჰაერს სუნთქავდნენ. ბაზრობაზე, რომ საქონელი გადაყავთ ძარა ახდილია სუფთა ჰაერი ისუნთქოსო. ჩვენ შემთხვევაში ამას ვინ იფიქრებს?“ – ეს ამონარიდია იმ განცხადებიდან, რომელიც სოფელ უდეს მცხოვრებლებმა „სამხრეთის კარიბჭეს“ გამოუგზავნეს. განცხადებას ხელს 26 ადამიანი აწერს.
სოფლის მცხოვრებლები ამბობენ, რომ ასეთივე განცხადება მათ შპს „ჯეო ტივშიც“ მიიტანეს, იმ კომპანიაში, რომლის მიკროავტობუსებიც უდე–ახალციხის მარშრუტზე მუშაობს.
ამ განცხადებამდე ერთი კვირით ადრე, უდის მცხოვრებლებმა რედაქციას კიდევ ერთი წერილი გამოუგზავნეს. მასში ნათქვამია, რომ არჩევნებამდე „ქართული ოცნება“ ადგილობრივებს მგზავრობის გაიაფებას ჰპირდებოდა, თუმცა, არაფერი შეცვლილა: „თქვენი იმედი აქვს მოსახლეობას, იქნებ თქვენმა სიტყვამ შეაგნებინოს, რომ ხალხის მოტყუება დანაშაულია და ხალხს აქვს ის მეხსიერება, რომ ნათქვამი და დაპირებები უნდა შესრულდეს“.
უდე–ახალციხის მიმართულებით შპს „ჯეო ტივისა“ და შპს „ადიგენის სატრანსპორტო საწარმოს“ „მიკროავტობუსები“ მოძრაობს. ორივე კომპანია სატრანსპორტო ბაზარზე წლებია არსებობს და ხაზებს სხვა მიმართულებითაც ფლობენ. ამ ორიდან, ერთი, შპს „ადიგენის სატრანსპორტო საწარმო“ ადიგენში ფუნქციონირებს. კომპანიის მფობელი თამაზ ძაძამიაა, რომელიც გასული წლის თვითმმართველობის არჩევნების შემდეგ ადიგენის მუნიციპალიტეტის საკრებულოში თავმჯდომარის მოადგილედ აირჩიეს. საჯარო სამსახურში წასვლის შემდეგ, მან კომპანია შვილს, გიორგი ძაძამიას გადააბარა. ორივე კომპანიაში ამბობენ, რომ მოსახლეობის უკმაყოფილების არ ესმით, მგზავრობის გაიაფება კი საერთოდ გამორიცხულია.
შპს „ჯეო ტივში“ ადგილობრივების განცხადება მიიღეს. „ჯეო ტივის“ დირექტორი ნუგზარ მამუკაშვილი ამბობს, რომ ორი წლის წინ ამ მარშრუტზე ავტობუსი დანიშნა და მგზავრობის ღირებულებაც გააიაფა, თუმცა, ადგილობრივი მძღოლებისადმი სოლიდარობის ნიშნად, ხალხი ავტობუსით მგზავრობაზე უარს აცხადებდა: „ამიტომ გადავიყვანე სხვა ხაზზე. რაც შეეხება ფასს, საწვავის გაიაფების მიუხედავად, ღირებულების შემცირება გამორიცხულია. ფასს საწვავი არ განსაზღვრავს, გარკვეულწილად არის დამოკიდებული, თუმცა აქ სხვაც ბევრი კომპონენტია: სათადარიგო ნაწილები, საბურავები, რემონტი, ტექნიკური მომსახურება“.
მგზავრობის გაიაფებას კატეგორიულად გამორიცხავენ მეორე კომპანიაშიც. გიორგი ძაძამია „სამხრეთის კარიბჭესთან“ სატელეფონო საუბარში აცხადებს, რომ მათი სატრანსპორტო საშუალებები მწყობრშია და მხოლოდ ერთი მიკროავტობუსია მოძველებული.
კომპანიების დირექტორების მსგავსად, ადგილობრივების პროტესტი გაუგებარია მიკროავტობუსების მძღოლებისთვისაც. ისინი ამბობენ, რომ ამ მიმართულებით ტრანსპორტი ყოვლ ერთ საათში მიდის და ხშირად ცარიელი მანქანით უწევთ მგზავრობა.
მიუხედავად იმისა, რომ მიკროავტობუსებს სიძველე ერთი შეხედვით ეტყობა, მძღოლები არც ამას აღიარებენ.
„24 წელია ვმუშაობ და არცერთი შემთხვევა არ დაფიქსირებულა ავტოსაგზაო შემთხვევის. შეიძლება მთალდ კომფორტული მანქანა არ იყოს, მაგრამ ნორმალურ მდგომარეობაშია“, – ამბობს „მარშუტკის“ მძღოლი ავქსენტი ბოჩიკაშვილი და ამატებს, რომ მოსახლეობას მათი საწინააღმდეგო არაფერი უნდა ჰქონდეს: „გვერდით ვუდგავართ, არ არსებობს მძღოლი, რამე დაავალონ და არ მოემსახუროს. სოფელი დიდია, შეიძლება რამდენიმე იყოს უკმაყოფილო“.
ადგილობრივების მოთხოვნა ტრანსპორტის განახლებაზე მძღოლებს შეუძლებლად მიაჩნიათ.
„ახალი ავტობუსი 20–30 ათასი ევრო ღირს, იმის თანხას ჩემი შვილიშვილიც ვერ გადაიხდის. შემოიყვანოს სახელმწიფომ, დაგვასაქმოს, ხელფასი გადაგვიხადოს და ვიმუშავებთ, საწინააღმდეგო არაფერი გვაქვს“, – ამბობს ალექსი თუმანიშვილი.
მძღოლებისგან განსხვავებით, კომპანიები ირწმუნებიან, რომ ტრანსპორტის განახლებას გეგმავენ.
„მიუხედავად ყველაფერისა, ვგეგმავთ ახალი ავტობუსის შეძენას, რომელსაც ექნება საბარგულები და უდის ხაზზე გავუშვებთ“, – ამბობს ნუგზარ მამუკაშვილი.
„ერთი მიკროავტობუსია მოძველებული და უახლოეს მომავალში მის შეცვლასაც ვგეგმავთ“, – ირწმუნება გიორგი ძაძამიაც.
არაერთხელ იმედგაცრულებულ ადგილობრივებს, კომპანიების მფლობელთა დაპირების ნაკლებად სჯერათ.
„მძღოლებსა და იმ პირებს, როგორიცაა: თამაზ ძაძამია და ნუგზარ მამუკაშვილი, რომლებიც კომფორტულად გადაადგილდებიან საკუთარი მანქანებით, რაში აინტერესებთ ისედაც დაღარიბებული ხალხი... კიდევ ერთხელ შევახსენებთ ზემოთ დასახელებულ ამ ტრანსპორტის მესვეურებს, მარტო ფულის აღება არ ნიშნავს მგზავრთა უსაფრთხო და წესიერ გადაადგილებას“, – ამბობენ წერილში და გამოსავალი რომ არსებობს, ამაში დარწმუნებული არიან: „ჩვენ სოფელ უდეს აქვს პრობლემა, არც თუ ისე ძნელი მოსაგვარებელი. მხოლოდ მონდომებაა იმ ადამიანებისა, ვისაც ეს ეხება“.
იხილეთ ვიდეო[თინათინ ზაზაძე, ადიგენი]