უდეს მცხოვრები:'კისრიდანაც რომ დამკიდონ, მაინც ვიტყვი, რომ 'ნაციონალების' მხარდამჭერი ვარ'

ადიგენის მუნიციპალიტეტის სოფელ უდეში „ნაციონალური მოძრაობის“ საპრეზიდენტო კანდიდატის დავით ბაქრაძის მხარდასაჭერად მოქალაქეები რამდენიმე სოფლიდან შეიკრიბნენ.

„იმიტომ შევიკრიბეთ, რომ გვინდა დავით ბაქრაძემ გაიმარჯვოს და გახდეს ჩვენი პრეზიდენტი, რადგან კარგი ადამიანია. არცერთი სხვა კანდიდატის წინასაარჩევნო პროგრამას არ ვიცნობ და არც მაინტერესებს. სადაც არ უნდა იყოს, წავალ და ბაქრაძეს მივცემ ხმას“, - გვითხრა სოფელ უდის მკვიდრმა ზოია აღოშაშვილმა.

ადგილობრივები დღეს ხელისუფლების მუშაობას აკრიტიკებდნენ და ამბობდნენ, რომ ბიძინა ივანიშვილის გუნდს მხარს არ დაუჭერენ, რადგან ივანიშვილმა ხალხისთვის მიცემული პირობა არ შეასრულა.

„ოცნებას“ არაფერი გაუკეთებია და მათი ბევრი დანაშაულიც ვიცით. თუ მოვიდა, დაპირება მოგვცა, ახლა სად მიდის?! ჯერ გააკეთა რამე? რატომ უნდა წავიდეს?“ - უკვირს ალექსი მერაბიშვილს.

ასევე სოფელი უდეს მცხოვრები ელისო თათოშვილი ფიქრობს, რომ მოსახლეობას ხელისუფლების ეშინია და ამიტომ დღეს შეხვედრაზე მოსვლისგან ბევრმა თავი შეიკავა: „ამხელა სოფელია და ძალიან ცოტა ხალხი გამოვიდა, შიში აქვთ ახალი ხელისუფლების. მე არ ვმალავ, რომ ბაქრაძეს ვუჭერ მხარს. კისრიდანაც რომ დამკიდონ, მაინც ვიტყვი, რომ „ნაციონალური მოძრაობის“ მხარდამჭერი ვარ“.

სოფელ უდეში ნაციონალური მოძრაობის საპრეზიდენტო კანდიდატის ვიზიტი დაახლოებით ნახევარ საათს გაგრძელდა. შეხვედრა საქართველოს ჰიმნით დასრულდა.

შეგახსენებთ, მესხეთში ვიზიტად მყოფი „ნაციონალების“ პრეზიდენტობის კანდიდატი დავით ბაქრაძე ამომრჩეველებს ვანო მერაბიშვილის მშობლიურ სოფელში, უდეში შეხვდა და ხალხს ერთგულებისთვის მადლობა გადაუხადა.

[თინათინ ზაზაძე, ადიგენი]