ცნობილია ‘ფოტო სინთეზის’ გამარჯვებულები სამცხე–ჯავახეთიდან

გუშინ , 3 მარტს ქუთაისში დავით კაკაბაძის სახელობის სახვითი ხელოვნების გალერეაში, კონკურს ,,ფოტო სინთეზში’’ იმერეთის, რაჟა-ლეჩხუმის, ქვემო სვანეთის, სამცხე-ჯავახეთის რეგიონების სასკოლო ტურის გამარჯვებული მოსწავლეების ფოტო გამოფენა გაიმართა .

სამცხე-ჯავახეთის რეგიონიდან გამოფენაში 24 მოსწავლე მონაწილეობდა: 12 ახალციხის მუნიციპალიტეტიდან, 5 ასპინძის მუნიციპალიტეტიდან, 3 ნინოწმინდის მუნიციპალიტეტიდან, 2 ბორჯომიდან და თითო – თითო ადიგენისა და ახალქალაქის მუნიციპალიტეტებიდან.

რეგიონულ გამოფენაზე სამცხე-ჯავახეთიდან 3 გამარჯვებული შეარჩიეს:

I ადგილი - გიორგი ტაბატაძე, ახალციხის N5 საჯარო სკოლა
II ადგილი - თამთა კაპანაძე, ახალციხის მუნიციპალიტეტი, ტყემლანის საჯარო სკოლა
III ადგილი - მარიამ მაღრაძე, ასპინძის საჯარო სკოლა

ეს სამი მოსწავლე იბრძოლებს ნიკო კეცხოველის I, II და III პრემიის მოსაპოვებლად 21 მარტს თბილისში. ეროვნული დონის გამოფენაზე მონაწილეობას მიიღებს საქართველოს ყველა დანარჩენი რეგიონის სამ-სამი წარმომადგენელიც.

რაც შეეხება სკოლების სტენდების კონკურსს, სამცხე–ჯავახეთიდან სტენდი მხოლოდ გორელოვკის N 3 საჯარო სკოლამ წარადგინა და ავტომატურად, ის გახდა რეგიონის გამარჯვებული.

გამოფენის ყველა მონაწილეს გადაეცა სპეციალური სერთიფიკატები, პრიზები და ფასიანი საჩუქრები.

ფოტოკონკურსის ორგანიზატორია კავკასიის გარემოსდაცვითი არასამთავრობო ორგანიზაციების ქსელი, საქართველოს გარემოსა და ბუნებრივი რესურსების დაცვის სამინისტრო, საქართველოს განთლებისა და მეცნიერების სამინისტრო და აფხაზეთის ავტონომიური რესპუბლიკის განათლებისა და კულტურის სამინისტრო.

ფოტოკონკურსი ხორციელდება მთელი საქართველოს მასშტაბით, "ტყის მდგრადი მართვა საქართველოში" პროექტის ფარგლებში ავსტრიის თანამშრომლობა განვითარებისათვის ფინანსური მხარდაჭერით.





[ნინო ნარიმანიშვილი, ახალციხე]