ნიკო კეცხოველის პრემიის მოსაპოვებლად, სამცხე–ჯავახეთიდან ფინალურ ტურში, ორი სკოლა გადავიდა

ფინალურ ტურში, რომელიც 21 მარტს თბილისში გაიმართება ჯამში ქვეყნის მასშტაბით 19 სკოლა მიიღებს მონაწილეობას.

შეგახსენებთ, რომ ნიკო კეცხოველის სახელობის სასკოლო პრემიის პირველ ტურში 152 სკოლას შორის ყველაზე მეტი 4,485 ქულა ადიგენის მუნიციპალიტეტის სოფელ ლელოვნის საჯარო სკოლამ დააგროვა. ნახევარფინალში ის სკოლები გადავიდნენ, რომლებსაც 300 ქულაზე მეტი ჰქონდათ.

სამცხე–ჯავახეთიდან პრემიის მოსაპოვებლად 14 საჯარო სკოლა იბრძოდა, თუმცა ნახევარ ფინალში მხოლოდ ორი: ახალციხის N1 და ლელოვნის საჯარო სკოლა გადავიდა.

ქართველი ბოტანიკოსის, მწერალის და საზოგადო მოღვაწის სახელობის კონკურსი რამდენიმე წელია ტარდება. ნიკო კეცხოველის სახელობის კონკურსს ორგანიზაცია CENN-ი, გარემოს დაცვის სამინისტროს პარტნიორობით ატარებს. კონკურსის ფარგლებში, საქართველოს სკოლებში შეიქმნა გუნდები, რომლებიც, პარტნიორ სახელმწიფო და საზოგადოებრივ ორგანიზაციებთან ერთად, ატარებენ დამოუკიდებელ მონიტორინგს და ახორციელებენ სხვადასხვა სახის გარემოსდაცვით აქტივობებს. ახალგაზრდების აქტივობები სხვადასხვა ქულით ფასდება.

გასული წლებისგან განსხვავებით, წელს საკონკურსო თემატიკა გაფართოვდა და ტყეებთან ერთად, ნარჩენების, ბუნებრივი კატასტროფებისა და მინერალური რესურსების მოპოვების პრობლემატიკასაც მოიცავს. კონკურსში, ნიკო კეცხოველის I, II და III პრემიასთან ერთად, დაწესდება უამრავი პრიზი, როგორც ორგანიზატორებისგან, ასევე პარტნიორი სახელმწიფო და კერძო ორგანიზაციებისაგან.

„მაღალი შეფასება ექნება გარემოსდაცვით აქტივობებს, რომელსაც სკოლები საკუთარი ინიციატივით განახორციელებენ, ქულათა მაქსიმუმი კი, ნიკო კეცხოველის წიგნებში აღწერილი მარშრუტების გამეორებისა და განახლების შემთხვევაში დაიწერება”, - აცხადებენ CENN-ში.

[თინათინ ზაზაძე, ახალციხე]