სამცხე–ჯავახეთის სკოლები ნიკო კეცხოველის პრემიის მოსაპოვებლად იბრძვიან

კავკასიის გარემოსდაცვითი არასამთავრობო ორგანიზაციების ქსელმა (CENN), ნიკო კეცხოველის 2017 წლის პრემიის მოსაპოვებლად სასკოლო კონკურსი, გარემოსა და ბუნებრივი რესურსების დაცვის სამინისტროსთან და განათლებისა და მეცნიერების სამინისტროსთან ერთად გამოცხადა.

კონკურსის მიზანია სკოლებმა (მოსწავლეებმა და პედაგოგებმა) რაც შეიძლება მეტად წარმოაჩინონ საკუთარი თავი, დაგეგმონ და განახორციელონ „მწვანე აქტივობები“ და ამგვარად შეიტანონ გარემოსდაცვითი კომპონენტი საგანმანათლებლო პროცესში.

სწორედ აღნიშნული პროექტის განსახორციელებლად დღეს, 10 ნოემბერს, ახალციხის N1 საჯარო სკოლის მოსწავლეებმა დასუფთავების აქცია მოაწყვეს. მე–11 კლასის 15–მდე მოსწავლემ N3 საჯარო სკოლის მიმდებარე ტერიტორია დაასუფთავა.

„ორი კვირაა რაც ჩავერთეთ. პროექტი სხვადასხვა კომპონენტს მოიცავს, ამ ეტაპზე სკოლის ტერიტორია დავასუფთავეთ. კიდევ ვგეგმავ არაერთ აქტივობას“, – ამბობს N1 საჯარო სკოლის მოსწავლე ტატო ზუმბაძე.

მსგავსი ტიპის აქცია განახროციელეს ადიგენის მუნიციპალიტეტის სოფელ ლელოვანის საჯარო სკოლის მოსწავლეებმაც.

ქართველი ბოტანიკოსის, მწერალის და საზოგადო მოღვაწის სახელობის კონკურსი რამდენიმე წელია ტარდება. გასული წლებისგან განსხვავებით, წელს საკონკურსო თემატიკა გაფართოვდა და ტყეებთან ერთად, ნარჩენების, ბუნებრივი კატასტროფებისა და მინერალური რესურსების მოპოვების პრობლემატიკასაც მოიცავს. კონკურსში, ნიკო კეცხოველის I, II და III პრემიასთან ერთად, დაწესდება უამრავი პრიზი, როგორც ორგანიზატორებისგან, ასევე პარტნიორი სახელმწიფო და კერძო ორგანიზაციებისაგან.

„მაღალი შეფასება ექნება გარემოსდაცვით აქტივობებს, რომელსაც სკოლები საკუთარი ინიციატივით განახორციელებენ, ქულათა მაქსიმუმი კი, ნიკო კეცხოველის წიგნებში აღწერილი მარშრუტების გამეორებისა და განახლების შემთხვევაში დაიწერება”, - აცხადებენ CENN-ში.

კონკურსში მონაწილე სკოლების რეგისტრაცია 1 დეკემბრამდეა შესაძლებელი. კონკურსი ორი თვის განმავლობაში გაგრძელდება და თებერვლის ბოლოს დასრულდება. ქულების დათვლა და ინფორმაციის გავრცელება http://www.forestry.ge/ ვებ გვერდის საშუალებით ხდება.

[თინათინ ზაზაძე, ახალციხე]