ახალციხეში სამ ქუჩაზე წყლის ცენტრალურ სისტემას ცვლიან

ახალციხეში, მთაწმინდელის ქუჩაზე, სადაც ასფალტი სამი თვის წინ, მსოფლიო ბანკის დაფინანსებით დააგეს, ისევ აყრილია. ამ ქუჩაზე ისევ მძიმე ტექნიკა მუშაობს და ქუჩას თხრის.

სამუშაოებს აზერბაიჯანულ–ქართული შპს „ასნაფი“ ასრულებს. როგორც სამუშაოთა მწარმოებელმა დავით აბრამიშვილმა განგვიმარტა, აღნიშნულ ქუჩაზე სასმელი წყლის სისტემა უნდა გამოცვალონ.

მთაწმინდელის ქუჩის გარდა, სამუშაოები მიმდინარეობს მეზობელ ქუჩებზეც:თამარაშვილსა და გრიგოლ ხანძთელზე.სამივე უბანში სასმელი წყლის სისტემის შესაცვლელად ევრო ბანკმა 1.500.000 ლარი გამოყო. დამკვეთი მუნიციპალური განვითარების ფონდია.

„სამუშაოები ნოემბერში დაიწყო და სექტემბერში უნდა დასრულდეს. წყლის სისტემას მთლიანად ვცვლით. ძველი აღარ იარსებებს და მთლიანად ახალ სისტემაზე გადავა. სამუშაოებზე დაახლოებით 60 ადამიანი გვყავს დასაქმებული“, – ამბობს სამუშაოთა მწარმოებელი დავით აბრამიშვილი და ამატებს, რომ იმ ქუჩებზე, სადაც წყლის მილებს ცვლიან, დაზიანებულ ასფალტს თავადვე აღადგენენ.

სარეაბილიტაციო სამუშაოების გამო, ამ დროისთვის აღნიშნულ ქუჩებს წყალი არ მიეწოდებათ.

„საქართველოს გაერთიანებული წყალმომარაგების კომპანიის“ სამცხე–ჯავახეთის რეგიონული ფილიალის ხელმძღვანელის გიორგი ბაგინაშვილის განმარტებით სისტემის გამოცვლის შემდეგ კერძო სახლების გამრიცხველიანება დაიწყება.

მიმდინარე წელს ცენტრალური წყლის სისტემა შეიცვლება მარდის დასახლებაში რამდენიმე ქუჩაზეც. სამუშაოები უკვე დასრულებულია რაბათში.

შპს „ასნაფი“გარდა ახალციხისა წყლის სისტემას დაბა ასპინძაშიც შეცვლის.



[თინათინ ზაზაძე, ახალციხე]