ათონელის ქუჩაზე ერთი თვის დაგებული ასფალტი აყარეს

როგორც ახალციხის მერიაში განგვიმარტეს, ათონელის ქუჩაზე ასფალტი დაახლოებით ერთი თვის წინ დააგეს, ამ ეტაპზე კი მიმდებარე ქუჩების რეაბილიტაცია მიმდინარეობს.

როგორც ადგილობრივები აცხადებენ ახლადდაგებული ასფალტი ახალციხის N6 ბაგა–ბაღში სასმელი წყლის სისტემის შეყვანის გამო დააზიანეს.
„მოასფალტება არ დაუსრულებიათ და ისევ თხრიან. ხომ შეიძლებოდა ჯერ მოეწესრიგებინათ მიწისქვეშა სამუშაოები და მერე დაეგოთ ასფალტი“, – აცხადებენ ადგილობრივები.

ახალციხის სკოლამდელი აღზრდის დაწესებულებათა გაერთიანების ხელმძღვანელის ნანა ბერიძის განმარტებით აღნიშნული ადგილიდან ნამდვილად შეყავთ წყალი, თუმცა ასფალტი გაერთიანების დავალებით არ გადათხრილა.

„მაგ ადგილზე რაღაც დაზიანებულა, როდესაც შეკეთება დაიწყეს აღმოჩნდა, რომ 24–საათიანი წყალმომარაგების სიტემა გადის გადავწყვიტეთ, რომ ეს წყალი შემოგვეყვანა“, – განაცხადა სატელეფონო საუბარში ნანა ბერიძემ.

მისივე თქმით, იმისათვის, რომ ახლადდაგებული ასფალტი არ დაეზანებინათ, სასმელი წყლის სისტემა ბაგა–ბაღში შენობის მეორე მხრიდან იქამდე შეიყვანეს, ვიდრე ასფალტი დაიგებოდა:“დაზიანების შემდეგ აღმოჩნდა, რომ შეგვეძლო შეგვეყვანა 24–საათიანი წყალმომარაგება, არჩევანი გავაკეთეთ, ამიტომ მოხდა დაერთება ბაღის. სამუშაოებს წყალმომარაგების კომპანია ასრულებს“.

„განშტოება შეიცვალა, დახლოებით 4 კვადრატია ასფალტის დაზიანებული, ჩვენ სამუშაოები უკვე დავასრულეთ“, – ამბობს საქართველოს გაერთიანებული წყალმომარაგების კომპანიის ტექნიკური აქტივობის მართვის დეპარტამენტის უფროსი მიხეილ თათარაძე.

მისივე თქმით, ათონელის ქუჩაზე აყრილ ასფალტს, ის კომპანია დააგებს, რომელმაც გზის სარეაბილიტაციო სამუშაოები განახორციელა:„საგზაო სამშენებლო სამმართველო N1–მა“ შეასრულა ამ ქუჩაზე სამუშაოები, ეს საკითხი უკვე შეთანხმებული გვაქვს, რომ აღნიშნული კომპანია დააგებს ასფალტს. აქამდეც დააგებდა უბრალოდ ცუდმა ამინდებმა შეუშალათ ხელი“.

შეგახსენებთ, რომ ახალციხეში ახლადდაგებული ასფალტი აყარეს რამდენიმე დღის წინ ქეთევან დედოფლის ქუჩაზეც, სადაც ძველი საკანალიზაციო სისტემა შეცვალეს.



[თინათინ ზაზაძე, ახალციხე]