2014 წლის 'იმედის გმირი' სამცხე – ჯავახეთის სკოლის მოსწავლეებს შეხვდა

მინდია შაინიძესთან შეხვედრა არასამთავრობო ორგანიზაცია „ახალციხის ახალგაზრდული ცენტრის“ ორგანიზებით დაიგეგმა.

შეხვედრას ახალციხის, ადიგენის, ასპინძისა და ბორჯომის სკოლის მოსწავლეები ესწრებოდნენ, რომელბიც სამოქალაქო განათლების პროგრამის „მომავალი თაობის“ მონაწილეები არიან.

როგორც „ახალციხის ახალგაზრდული ცენტრის“ დირექტორი მაკა სუდაძე ამბობს, აღნიშნული პროგრამის ერთ – ერთი მიმართულებაა ახალგაზრდების შეხვედრა ისეთ ადამიანებთან, რომელთა ცხოვრებაც მათთვის მაგალითი იქნება.

„როგორც ჩვენი, ისე ახალგაზრდების სურვილი იყო, რომ შევხვედროდით იმედის გმირს მიდნია შაინიძეს. ეს ახალგაზრდა წლების წინ იყო ჩვენი სამოქალაქო კლუბის წევრი და აქტიურად იყო ჩართული სხვადასხვა ღონისძიებებში. ჩვენ გვინდა, რომ ახალგაზრდებმა მოუსმინონ მას და მისი ცხოვრების მაგალითი აქციონ საკუთარი ცხოვრების მაგალითად“, – ამბობს მაკა სუდაძე.

ახალგაზრდებმა მინდია შაინიძის შესახებ ტელეკომპანია იმედის მოზმზადებულ ფილმ უყურეს, შემდეგ კი შეკითხვები დაუსვეს.

„მე შევეცადე ჩემი გამოცდილება გამეზიარებინა ბავშვებისთვის. მზად ვარ, შეძლებისდაგვარად ყველას დავეხმარო“, – ამბობს მინდია შაინიძე.

შეგახსენებთ, რომ „იმედის გმირი“ 2014 წელს, ადიგენის მუნიციპალიტეტის სოფელ ზანავის მცხოვრები, 19 წლის მოჭიდავე მინდია შაინიძე გახდა. მას ორი წელია საკუთარ სახლში გახსნილი აქვს სავარჯიშო დარბაზი და სამი სოფლის 45 ბავშვს თავისუფალი სტილით ჭიდაობაში ავარჯიშებს. იგი თავის სახსრებით ყიდულობს მოსწავლეებისთვის ფორმებს და დაჰყავს შეჯიბრებებზე, სადაც არა ერთ წარმატებას მიაღწიეს.

გარდა ამისა მინდია შაინიძე იმ ბავშვებს, რომლებსაც ჭიდაობაში ავარჯიშებს სკოლის საგნებშიც უსასყიდლოდ ამეცადინებს.



[მანანა სარაშვილი, ახალციხე]