„იმედის გმირი“ ჭიდაობის დარბაზის ასაშენებლად დახმარებას ითხოვს

მინდია შაინიძე რამდენიმე წელია ადიგენის მუნიციპალიტეტში მცხოვრებ ახალგაზრდებს ჭიდაობაში, საკუთარ სახლში მოწყობილ დარბაზში უსასყიდლოდ ავარჯიშებს. ამ ეტაპზე ჭიდაობაში 50 – მდე ბავშვი ვარჯიშობს. მინდია შაინიძის თქმით, ვარჯიშის სურვილი უფრო მეტ ბავშვს აქვს. ამიტომ გადაწყვიტა, რომ სოფელში ჭიდაობის დარბაზი ააშენოს, სადაც ვარჯიშს 6 სოფლის ახალგაზრდები შეძლებენ.

„განაპირა სოფელში ვცხოვრობ, რის გამოც პატარა ბავშვები ჩემთან სიარულს ვერ ახერხებენ. ჭიდაობაში ვარჯიშის სურვილი კიდევ 100 – მდე ბავშვს აქვს, ამიტომ გადავწყვიტე, რომ დარბაზი ბავშვებისთვის მოსახერხებელ ადგილზე ავაშენო, – ამბობს მინდია შაინიძე და ამატებს, რომ სანამ მიწას იყიდიდა, მან დახმარებისთვის ადიგენის მუნიციპალიტეტის გამგეობას მიმართა:"შენობისთვის მიწის ყიდვა ისევ ზანავში ოღონდ სხვა ტერიტორიაზე მინდოდა, რომელიც სკოლასთან კიდევ უფრო ახლოს იქნებოდა. გამგეობაში მითხრეს, რომ მიწის ყიდვაში ვერ დამეხმარებოდნენ, ალტერნატიული ფართის მოძებნა მირჩიეს და განათლების სამინისტროში გადამამისამართეს. სამინისტრომაც უარი მითხრა“.

მისი თქმით, გამგეობა ამ საკითხით არ დაინტერესდა. სხვა შემთხვევაში შესაძლებელი იყო, რომ მას აღნიშნული მიწის ნაკვეთი ეყიდა: „გამგეობა მართლა რომ დაინტერესებულიყო, განათლების სამინისტროსთან მიშუამდგომლებდა და მიწის შეძენა პრობლემა არ იქნებოდა“, – ამბობს შაინიძე.

მან საკუთარი სახსრებით სოფელ ზანავში მიწის ფართობი მაინც იყიდა და 2014 წელს „იმედის გმირებში“ გამარჯვებისთვის მიღებულ 5000 ლარს 100 – 150 ბავშვზე გათვლილი დარბაზის ასაშენებლად გამოიყენებს. მისი თქმით, აღნიშნული თანხა საკმარისი არ არის.

„მოგეხსენებათ ჭიდაობის დარბაზისთვის ბევრი დეტალია საჭირო, გაუთვალისწინებელი ხარჯები, ამიტომ ადგილობრივ ხელისუფლებას და ყველას ვისაც შეუძლია დახმარება ვთხოვ, რომ გვედრში დამიდგნენ“, – ამბობს შაინიძე.

მას ანგარიშის ნომერი აქვს გახსნილი სადაც ნებისმიერ მსურველს შეუძლია, რომ გარკვეული წვლილი შეიტანოს ადიგენის მუნიციპალიტეტში ჭიდაობის დარბაზის მშენებლობაში.

პრივატბანკი GE16TP5377645001908124 USD
GE91TP5377645001908132 GEL

მინდია შაინიძე გამარჯვებისთვის მიღებული თანხის ჩარიცხვას ელოდება, რის შემდეგაც დარბაზის მშენებლობა დაიწყება.

[მანანა სარაშვილი, ახალციხე]