ადიგენში მომხდარ მკვლელობაში ბრალდებულმა აღკვეთის ღონისძიებად პატიმრობის შეფარდებაზე თანხმობა განაცხადა

სასამამრთლო პროცესი დღეს, 31 აგვისტოს ახალციხის რაიონულ სასამართლოში გაიმართა. სხდომა 9:00 საათზე დაიწყო და 15 წუთში დასრულდა. ამ ხნის განმავლობაში სასამართლოსთან დაახლოებით 40-მდე სამართალდამცავი და ათამდე პოლიციის პიკაპი იდგა.

პროცესს ბრალდებულის ახლობლები არ ესწრებოდნენ. მას არც დაქირავებული ადვოკატი ჰყავდა. კუბლაშვილს იურიდიული დახმარების ბიუროს ადვოკატი ტარიელ ბალაბანაშვილი იცავდა.

პროკურორმა მამუკა ქომოშვილმა აღკვეთის ღონისძიებად პატიმრობის შეფარდებაზე იშუამდგომლა. მას დაეთანხმა დაცვის მხარე.
„თანახმა ვარ“, - განაცხადა ბრალდებულმა დავით კუბლაშვილმა სასამართლო დარბაზში.

მოსამართლე მარიკა ჩიტაშვილმა ადგილზე თათბირით პროკურორის შუამდგომლობა დააკმაყოფილა.
წინა სასამართო სხდომა 20 ოქტომბერს 14 საათზე ჩაინიშნა.

შეგახსენებთ, რომ 28 აგვისტოს, მარიამობის დღესასწაულზე სოფელ იმერთუბანში (ყარათუბანში) მცხოვრები სამი ახალგაზრდა მამაკაცი მოკლეს, ერთ-ერთი გარდაცვლილის ძმა კი დაჭრეს. მკვლელობაში ბრალდებული ადიგენში საჯარო რეესტრის ეროვნული სააგენტოს უფროსი დავით კუბლაშვილია, რომელიც შსს–მ ცხელ კვალზე დააკავა.





[თამუნა უჩიძე, ახალციხე]