სამი ახალგაზრდის მკვლელობაში ბრალდებულს სახელმწიფო ადვოკატიც დაიცავს

ახალციხის რაიონულ სასამართლოში სამმაგ მკვლელობაში ბრალდებულის საქმის განხილვა რამდენიმე წუთის წინ დაიწყო. დღეს სასამართლოში მოწმეებს, პოლიციის თანამშრომლებს დაჰკითხავენ.

სასამართლო პროცესზე დღეს ბრალდებულის ორი ადვოკატი გამოცხადდა. კუბლაშვილის საქმეში დღეიდან ჩაერთო სახაზინო ადვოკატიც.

შეგახსენებთ, სახელმწიფო ადვოკატის დანიშვნა მას შემდეგ გადაწყდა, რაც მიმდინარე წლის 4 მარტს პროცესი ადვოკატების მიზეზით გადაიდო. მაშინ პროცესს ბრალდებულის სამი ადვოკატიდან მხოლოდ ერთი დაესწრო, თუმცა, ჯანმრთელობის მდგომარეობის გამო მან პროცესის გადადება მოითხოვა.

შეგახსენებთ, სამი ახალგაზრდა: ვაჟა ნარიმანიშვილი, გიორგი სირბილაძე და ბორის სირბილაძე 2014 წლის, 28 აგვისტოს, მარიამობის ღამეს, მოკლეს. ერთ-ერთი გარდაცვლილის ძმა, ბექა სირბილაძე კი ფეხისა და გულ–მკერდის არეში დაჭრეს. მკვლელობაში ბრალდებული სამართალდამცველებმა ცხელ კვალზე დააკავეს. დავით კუბლაშვილი სასამართლო პროცესებს არ ესწრება. ექსპერტიზის დასკვნის მიხედვით იგი ფსიქიკურად დაავადებულია.

[sknews.ge]