ახალციხის პირველ ბაგა–ბაღში საკვამურში ცეცხლი გაჩნდა

პირველ ბაგა–ბაღში ხანძარი დღეს, 15 იანვარს დაახლოებით, 11:15 საათზე გაჩნდა. იმ ჯგუფში, სადაც საკვამურს ცეცხლი მოედო, სასწავლო პროცესი შეწყდა.

როგორც ბაგა–ბაღის თანამშრომლები ამბობენ, ძლიერი კვამლი საკვამურის თავზე გამვლელმა შენიშნა. სახანძრო ჯგუფი კი ბაღის მენეჯერმა გამოიძახა.

„მხოლოდ ერთ საკვამურში გაჩნდა ცეცხლი, იმიტომ რომ ძველი და გასაწმენდი იყო, დანარჩენი საკვამურები ფანჯრებში გვაქვს გაკეთებული და ხანძრის საფრთხე არ არსებობს. ამასაც ფანჯარასთან გადავიტანთ“, – აცხადებს ბაგა–ბაღის მენეჯერი თამარ ქიმერიძე და ამატებს, რომ მომხდარის გამო შენობა არ დაკვამლიანებულა.

ახალციხის ბაღების გაერთიანების ხელმძღვანელის, ნანა ბერიძის თქმით, იმ ჯგუფში, სადაც სასწავლო პროცესი შეწყდა 32 ბავშვი სწავლობს: „ზოგი ბავშვი მეორე ჯგუფში გადავიყვანეთ, ზოგიც მშობლებმა წაიყვანეს. ხვალიდან სასწავლო პროცესი ჩვეულებრივ განახლდება“.







[ლუბა გიორგაძე, ახალციხე]