გელა კოხოძე: ‘მუსლიმებისთვის ცუდი არასდროს არაფერი მიკადრებია’

გელა კოხოძე

ადიგენის რაიონული სამმართველოს მოხეს პოლიციის ქვეგანყოფილების უფროსი გელა კოხოძე ირწმუნება, რომ მუსლიმებისთვის ცუდი არასდროს არაფერი უკადრებია: „ძალიან ბევრი მუსლიმი მეგობარი მყავს“.

რაც შეეხება ჭელაში მინარეთის მოჭრის დღეს, როცა მუსლიმებმა კოხოძე, (რომელიც მაშინ ადიგენის რაიონული სამმართველოს ხელმძღვანელი იყო) სიტყვიერ შეურაცხყოფაში დაადანაშაულეს, იგი ამბობს, რომ მაშინ მსგავსი არაფერი ყოფილა: „არ ვიცი მაშინ რა მოეჩვენათ, ხმამაღალ ლაპარაკში რა როგორ გაიგეს, მერე კი ყველაფერი მე დამაბრალეს“.

კოხოძე აცხადებს, რომ მას ძალიან კარგი დამოკიდებულება აქვს ყველა ადგილობრივ მუსლიმთან: „მხოლოდ რამდენიმე ადამიანია, რომელსაც არ ვუყვარვარ. მაგრამ ბუნებრივია მათთან კონფლიქტში არ შევალ. ძალიან კეთილგანწოყობილი ვარ ყველას მიმართ, თუ რა თქმა უნდა, მაცლიან მუშაობას. მთავრობიდანაც ისეთი დამოკიდებულებაა, რომ არავინ უნდა გავაღიზიანოთ ზედმეტად“.

კითხვაზე, რა საჭირო იყო მოხეში პოლიციის განყოფილების გახსნა, გვპასუხობს, რომ ასე მთავრობამ გადაწყვიტა. მისი განმარტებით, ახალი განყოფილება ჯერ ახლა ყალიბდება და მის დაქვემდებარებაში დაახლოებით ხუთი საკრებულო შევა: „ახლა ვამონტაჟებთ კომპიუტერებს, შემოგვყავს დენი და ვაკეთებთ გათბობას. მუშაობას ყველას მიმართ კეთილგანწობილები ვიწყებთ და თუ დანაშაული მოხდება, ბუნებრივია, აღვკვეთთ“.

შეგახსენებთ, რომ გუშინ 12 თებერვალს, „ადამიანის უფლებების სწავლებისა და მონიტორინგის ცენტრმა“ (EMC) შინაგან საქმეთა სამინისტროს მიმართა განცხადებით, რომ გადასინჯონ მოხეს პოლიციის განყოფილების უფროსად გელა კოხოძის დანიშვნის გადაწყვეტილება. რადგან კოხოძე მუსლიმების მიმართ დისკრიმინაციულ დამოკიდებულებაში არაერთხელაა შემჩნეული.

გელა კოხოძის დანიშვნას ეწინააღმდეგებიან მოხეში მცხოვრები მუსლიმებიც. მათ „სამხრეთის კარიბჭესთან“ განაცხადეს, რომ მოხეში პოლიციის ქვეგანყოფილების გახსნის საწინააღმდეგო არაფერი აქვთ, მაგრამ უფროსად კოხოძის ნაცვლად სჯობდა სხვა პირი დაენიშნათ.


გელა კოხოძე პოლიციელებთან ერთად, სოფელ ჭელაში, მინარეთის დაბრუნების მეორე დღეს. 28 ნოემბერი, 2013წ."ს.კ"–ს არქივი.

[თამუნა უჩიძე, ახალციხე]