დეპუტატი საკრებულოს წინააღმდეგ–სასამართლომ შალვა გოგოლაძის საქმის განხილვა დაიწყო

„თავისუფალი დემოკრატების“ წევრის, ახალციხის საკრებულოს დეპუტატის შალვა გოგოლაძის საქმეზე გამართული პირველი სასამართლო სხდომა სწორედ ამ მიზეზით გადაიდო. მას შემდეგ, რაც გოგოლაძე თანამდებობიდან გადააყენეს, მის ადგილზე საკრებულოს დეპუტატი გელა პეტაშვილი დაინიშნა. მოსამართლე მარიკა ჩიტაშვილის განმარტებით, რადგან პეტაშვილს სასამართლოს გადაწყვეტილება უშუალოდ შეეხება, ადმინისტრაციული კოდექსი მოითხოვს, რომ იგი გოგოლაძის პროცესში ჩაერთოს და შესაგებელი მოამზადოს.

შალვა გოგოლაძე ახალციხის მუნიციპალიტეტის საკრებულოს 2014 წლის 21 ნოემბრის №48 განკარგულების ბათილად ცნობას ითხოვს. გოგოლაძე იურიდიული კომიტეტის თავმჯდომარეობიდან სწორედ ამ განკარგულების საფუძველზე გაათავისუფლეს. ასევე, სასარჩელო მოთხოვნაში გოგოლაძე, მისი სარჩელის დაკმაყოფილების შემთხვევაში, საკრებულოს წევრების მხრიდან მასობრივი ინფორმაციის საშუალებებით და მათ შორის „სამხრეთის კარიბჭეს“ მეშვეობით, საჯაროდ ბოდიშის მოხდას ითხოვდა.

თუმცა დღეს, მისი ინტერესების დამცველმა, „კონსტიტუციის 42–ე მუხლის“ წარმომადგენელმა ანზორ ხატიაშვილმა სასარჩელო მოთხოვნა დააზუსტა და განაცხადა, რომ საჯაროდ ბოდიშის მოხდას აღარ ითხოვენ და იმ შემთხვევაში თუ გოგოლაძის სარჩელი დაკმაყოფილდება, მას მორალური ზიანი 3.000 ლარით აუნაზღაურონ: „ასევე, ვითხოვთ, რომ სასამართლოს გადაწყვეტილების გამოტანისთანავე გოგოლაძე თანამდებობაზე დააბრუნონ“.

მოსარჩელე მხარის შუამდგომლობას მოპასუხე, ახალციხის მუნიციპალიტეტის საკრებულოს მთავარი სპეციალისტი იურიდიულ საკითხებში თინათინ დიაკონაშვილი არ დაეთანხმა: „უნდა მოგვეცეს კანონიერი უფლება, ახალციხის რაიონული სასამართლოს გადაწყვეტილება გავასაჩივროთ. ამიტომ მის შუამდგომლობას, სასამართლოს გადაწყვეტილების გამოტანისთანავე თანამდებობაზე დაბრუნდეს, არ ვეთანხმები.“

დღეს სასამართლოს საქმის მასალებზე დასართავად, მოსარჩელე მხარემ სხვადასხვა საინფორმაციო სააგენტოებში გამოქვეყნებული სტატიები გადასცა. მათ შორის საქმეს "სამხრეთის კარიბჭეში" გამოქვეყნებული სტატიაც დაერთო სათაურით, "დასჯა პარტიის ერთგულების გამო".

მომავალი სასამართლო პროცესი 20 თებერვალს, 15:00 საათზე გაიმართება. ამ დროისთვის გელა პეტაშვილი შესაგებელს მოამზადებს და სასამართლო პროცესზე მოწმეებიც დაიკითხებიან.

[თამუნა უჩიძე, ახალციხე]