სამცხე–ჯავახეთში 'თავისუფალი დემოკრატები' კოალიციაში რჩებიან

საქართველოს თავდაცვის ყოფილი მინისტრის ირაკლი ალასანიას თანამდებობიდან გადაყენების შემდეგ, როგორც თბილისში, ასევე რამდენიმე რეგიონში „თავისუფალი დემოკრატების“ წევრებმა კოალიცია დატოვეს, თუმცა ჯერ–ჯერობით ახალციხის, ადიგენის, ასპინძისა და ნინოწმინდის მუნიციპალიტეტის საკრებულოებში ფრაქცია „თავისუფალი დემოკრატების“ წევრები კოალიციის დატოვებას არ აპირებენ.

ახალციხის მუნიციპალიტეტის საკრებულოს ფრაქცია „თავისუფალი დემოკრატების“ თავმჯდომარის ბიძინა გოგოლაძის თქმით, დატოვებენ თუ არა საკრებულოს წევრები კოალიციას, რამდენიმე დღეში გაირკვევა: „ხვალ თბილისში ყრილობაზე მივდივართ, იქიდან რომ დავბრუნდებით, მერე გეტყვით რას ვაპირებთ, წინასწარ არაფრის თქმა არ შემიძლია“.

ადიგენის მუნიციპალიტეტის საკრებულოს ფრაქცია „თავისუფალი დემოკრატების“ თავმჯდომარე თამაზ ძაძამია ირაკლი ალასანიას თანამშრომლების საქმის დასრულებას ელოდება: „ველოდებით სასამართლოს გადაწყვეტილებას. თუ აღმოჩნდა, რომ ირაკლი ალასანია კორუფციაშია გარეული, ამის შემდეგ მივიღებთ გადაწყვეტილებას დავტოვებთ თუ დავრჩებით კოალიციაში“.

ასპინძის მუნიციპალიტეტის საკრებულოს ფრაქცია „თავისუფალი დემოკრატების“ თავმჯდომარე ალიკა ცინაძე გადაწყვეტილებას პარტიის წევრებთან კონსულტაციების გავლის შემდეგ მიიღებს: „ამ ეტაპზე ვერაფერს გეტყვით, კონსულტაციები უნდა გავიარო პარტიის წევრებთან. ორშაბათს მეცოდინება ზუსტი პასუხი“.

ნინოწმინდის მუნიციპალიტეტის საკრებულოს ფრაქცია „თავისუფალი დემოკრატების“ თავმჯდომარე ვოსკან ელოიანი ამბობს, რომ ამ თემაზე არ უსაუბრიათ: „ჯერ–ჯერობით ჩვეულებრივად ვაგრძელებთ მუშაობას. მომავალ კვირას მივიღებთ გადაწყვეტილებას“.

ასევე კოალიციაში რჩებიან პარტიის წევრები ახალქალაქშიც. "სამი წევრი ვართ და ვაგრძელებთ მუშაობას", – გვიტხრა ფრაქციის ტავმჯდომარემ მარტინ გაბრიელიანმა.

რაც შეეხება ბორჯომს, ბორჯომის მუნიციპალიტეტის საკრებულოში „თავისუფალი დემოკრატები“ არ არიან.

[მანანა სარაშვილი, ახალციხე]