ბორჯომში გარდაცვლილი პოლიციელის დაკრძალვის ხარჯებს შსს გაიღებს

შინაგან საქმეთა სამინისტრო გიორგი ბერუაშვილის გარდაცვალების გამო მწუხარებას გამოთქვამს და გარდაცვლილის ოჯახს თანაუგრძნობს. უწყებამ დღეს ოფიციალური განცხადება გაავრცელა.

„გიორგი ბერუაშვილის საზღვარგარეთ სამკურნალოდ გადაყვანა ბოლო მომენტამდე ვერ მოხერხდა მისი მდგომარეობის სიმძიმის გამო. თუმცა ექიმებმა პოლიციელის გადასარჩენად ყველაფერი გააკეთეს“, - ნათქვამია განცხადებაში.

შეგახსენებთ, გიორგი ბერუაშვილი, 23 იანვარს, ლიკანში სამსახურებრივი მოვალეობის შესრულების დროს, პატრულირებისას, წარსულში მრავალჯერ ნასამართლევმა, ბორჯომში მცხოვრებმა, 1977 წელს დაბადებულმა შალვა აბულაძემ ცეცხლსასროლი იარაღიდან რამდენიმე გასროლით დაჭრა და მიიმალა. გიორგი ბერუაშვილი 6 თებერვალს, საავადმყოფოში გარდაიცვალა.

ბერუაშვილთან ერთად დაიჭრა მეორე პოლიციელი გიორგი მახარაშვილი. მისი ჯანმრთელობის მდგომარეობა დამაკმაყოფილებელია. ამჟამად ის აკადემიკოს ნ. ყიფშიძის სახელობის საუნივერსიტეტო კლინიკაში გადის მკურნალობას.

„შალვა აბულაძის დასაკავებლად ოპერატიულ-სამძებრო ღონისძიებები ინტენსიურად მიმდინარეობს“, - აცხადებენ შსს-ში.

[ნინო ნარიმანიშვილი, ახალციხე]