გიორგი ბერუაშვილის ოჯახი კომპენსაციას მიიღებს

შს მინისტრი ვახტანგ გომელაური გიორგი ბერუაშვილის დაკრძალვაზე. 10 თებერვალი, 2015წ. ფოტო: შსს

აღნიშნულ ინფორმაციას საქართველოს შინაგან საქმეთა სამინისტრო ავრცელებს.

გიორგი ბერუაშვილის დაკრძალვას, დღეს, 10 თებერვალს, შს მინისტრი ვახტანგ გომელაური დაესწრო და ოჯახს მიუსამძიმრა.

გიორგი ბერუაშვილი შსს-ს სამცხე-ჯავახეთის სამხარეო მთავარი სამმართველოს ბორჯომის რაიონული სამმართველოს უბნის ინსპექტორ-გამომძიებლად მუშაობდა.

„გარდაცვლილი პოლიციელის დაკრძალვის ხარჯები შინაგან საქმეთა სამინისტრომ სრულად გაიღო. კანონის შესაბამისად, გარდაცვლილი უბნის ინსპექტორ-გამომძიებელ გიორგი ბერუაშვილის ოჯახი ფინანსურ კომპენსაციას მიიღებს, მის ოჯახის წევრებზე მზრუნველობას კი შინაგან საქმეთა სამინისტრო უზრუნველყოფს“, – აცხადებენ შსს–ში.

გიორგი ბერუაშვილი 2014 წლის 10 თებერვალს საპატიო ყარაულით დაკრძალეს.

შეგახსენებთ, გიორგი ბერუაშვილი, 23 იანვარს, ლიკანში სამსახურებრივი მოვალეობის შესრულების დროს, პატრულირებისას, წარსულში მრავალჯერ ნასამართლევმა, ბორჯომში მცხოვრებმა, 1977 წელს დაბადებულმა შალვა აბულაძემ ცეცხლსასროლი იარაღიდან რამდენიმე გასროლით დაჭრა და მიიმალა. გიორგი ბერუაშვილი მიმდინარე წლის 6 თებერვალს აკად. ნ. ყიფშიძის სახელობის ცენტრალურ კლინიკაში გარდაიცვალა. მდგომარეობის სიმძიმის გამო საზღვარგარეთ სამკურნალოდ მისი გადაყვანა ვერ მოხერხდა.

გარდაცვლილის ოჯახს დღეს სამძიმარი გამოუცხადა საქართველოს პრემიერ–მინისტრმა ირაკლი ღარიბაშვილმა.


გიორგი ბერუაშვილის დაკრძალვა, 10 თებერვალი, 2015წ. ფოტო: ია თინიკაშვილი


[ნინო ნარიმანიშვილი, ახალციხე]