პრემიერი ბორჯომში გარდაცვლილი პოლიციელის ოჯახს უსამძიმრებს

"კიდევ ერთხელ უდიდესი მწუხარება მინდა გამოვთქვა ქართველი პოლიციელის გიორგი ბერუაშვილის გარდაცვალების გამო და სამძიმარი ვუთხრა მის ოჯახს, ახლობლებს, კოლეგებს და მთელ საქართველოს.

გიორგი ბერუაშვილი პირნათლად ემსახურებოდა თავის საქმეს, იგი სამსახურებრივი მოვალეობის შესრულებისას, პატრულირების დროს დაიღუპა. მისი სიცოცხლე დამნაშავეობასთან ბრძოლას შეეწირა.

პატივს მივაგებ მის ხსოვნას, რომელმაც ღრსეულად მოიხადა ვალი თავისი ქვეყნისა და ხალხის წინაშე", – ნათქვამია პრემიერის განცხადებაში.

შეგახსენებთ, გიორგი ბერუაშვილი, 23 იანვარს, ლიკანში სამსახურებრივი მოვალეობის შესრულების დროს, პატრულირებისას, წარსულში მრავალჯერ ნასამართლევმა, ბორჯომში მცხოვრებმა, 1977 წელს დაბადებულმა შალვა აბულაძემ ცეცხლსასროლი იარაღიდან რამდენიმე გასროლით დაჭრა და მიიმალა. გიორგი ბერუაშვილი 6 თებერვალს, საავადმყოფოში გარდაიცვალა. ბერუაშვილის დაკრძალვის ხარჯებს შსს გაიღებს.

ბერუაშვილთან ერთად დაიჭრა მეორე პოლიციელი გიორგი მახარაშვილი. მისი ჯანმრთელობის მდგომარეობა დამაკმაყოფილებელია. ამჟამად ის აკადემიკოს ნ. ყიფშიძის სახელობის საუნივერსიტეტო კლინიკაში მკურნალობს.

„შალვა აბულაძის დასაკავებლად ოპერატიულ-სამძებრო ღონისძიებები ინტენსიურად მიმდინარეობს“, - აცხადებენ შსს-ში.

[ნინო ნარიმანიშვილი, ახალციხე]